金管局任總當日好豪氣咁一擲三十七億，買咗國際金融中心第二期十四層做總部，八方重記得任總當日喺立法會話呢單投資回報有幾好，又話將辦公室租畀其他國際金融機構，係威係勢，到咗今日三十七億蝕咗幾多唔好提，更大鑊係冇人租先難睇！
知情者同八方講，金管局原本搵租客已經好辛苦，𠵱家重搞多單非典型肺炎，班鬼佬走都走唔切，重話搬新辦公室，真係睬你都儍。所以任總惟有向自己啲「仔仔女女」，即係班監管機構打主意，但𠵱家潮流興瘦身，一定係大屋搬細屋，證監已經唔肯搬去國金中心，但聽講任總個「親生仔」──按揭證券公司，最近決定搬去國金中心，簡直比番書仔更有偉大情操。
不過有按證公司中人牙痛咁聲話，今時今日搬屋慳租金已經係「指定動作」，而且起碼要慳三、四成，但係呢次搬屋一定唔慳得多，萬一他朝要俾立法會拎去「問責」，唔知任總肯唔肯上去頂呢？
傳真︰2623-9278
電郵︰