譚詠麟、李克勤、陳慧琳、陳奕迅、Twins及容祖兒等人，昨晚齊到將軍澳電視城出席《勁歌金曲第一季季選》頒獎禮。其後眾人再為《追．憶張國榮》節目演出，獻唱張國榮的金曲作追思，其中陳奕迅獻唱《不羈的風》，Twins唱《怪你過份美麗》，而陳慧琳（Kelly）則演繹《追》等。
譚詠麟獻唱了《風繼續吹》，他說：「我好鍾意呢首歌，之前出翻唱人哋歌嘅碟都有唱。我當初知道張國榮自殺嘅消息時，真係唔相信，𠵱家心情好返啲。」有指阿倫將會扶靈，他昨晚一臉疑惑地說：「吓？我冇聽過，冇收到通知喎。」
Kelly透露未入行前已認識張國榮，因其男友一家人與張國榮十分稔熟，Kelly說：「我男朋友知道張國榮走咗後，成晚喺屋企唱佢啲歌，我聽到好心噏。」
獻唱《為你鍾情》的許志安表示他仍是新人時，張國榮知道他要宣傳卻沒靚衫，便叫安仔到其家揀衫。安仔說：「我打開佢衣櫃，好似睇見好多黃金咁，我揀咗一堆衫，𠵱家重留住幾件。」
採訪：卓美娟、王連連
攝影：仇志德、陳偉權
