生女怕爭寵　死等白馬王子
20歲恭子自傳寫真Sell低B

深田恭子出咗名過份受保護，難聽啲講就係事務所直情想將佢同外界隔絕，恭子早前當眾話自己前世係王妃呢單嘢，早已成為經典。我羅拉最近睇咗恭子本自傳《KYOKO8203》，唔知點解已經二十歲女嘅佢，講嘢重好似靚妹咁天真。

未生仔改定名
例如恭子話結婚後絕對唔可以生女，因為囡囡會搶佢老公，佢重一早為佢將來三個仔改咗名，分別係龍一、恭一同康一。而恭子又話自己如果唔做明星，就想試吓做社長，因為聽到人哋叫佢社長時，有種俾人捧上天嘅感覺喎。
恭子成日話理想男友係白馬王子，有人同佢講過世界根本冇白馬王子，搞到佢即時眼濕濕，真係陰功。恭子喺本書度再強調：「男友要係王子之餘重要好識煮嘢食！咁就最正！」
雖然恭子重好細路女，但呢種性格反而令到藝能界好多人錫佢，成日同恭子互傳短訊嘅名人好似和田秋子、黑木瞳、梅宮Anna同藤原龍也等，都喺本書度賀恭子出書。