如果大家有留意開我哋《車天車地》版的話，一定會留意到早前不少關於新款Grandis（SpaceWagon）嘅消息；最近日本方面又傳來新消息，話新車有望於5月正式推出。
從相片中可以睇到，新車外形設計與同廠人氣車款Colt極為相似，其中FamilyLook嘅鬼面罩及低斜頭燈設計，就最能夠將呢個特點展露出來；而圓渾嘅車身線條，亦予人有耳目一新之感呢！
車廂布局方面，亦同樣以圓渾線條為主，望落份外吸引突出之餘，空間亦較前變得闊落，乘坐倍覺舒適愜意，當然唔少得重有齊全車廂配備啦！另一方面，雖然廠方未有公布關於機械配搭嘅詳細資料，但一般相信新車會採用一台2.4公升MIVEC偈作動力核心，而唔係現行嘅GDI結構，動力輸出數值亦會有所增長。有興趣嘅車迷，不妨拭目以待喇！