財爺早前公布嘅新一年財政預算案，既要削減免稅額，兼且重對中產階層大幅加稅，大大減低香港人嘅消費意欲之餘，影響所及連帶有數萬從業員嘅香港汽車業亦大受打擊。早前，代表香港汽車商會嘅四大集團要員，曾經跟財經事務科嘅馬時亨有過一席對話；雖然未獲政府實質嘅回應，惟會談過後佢哋對未來香港汽車業前景，卻有不同見解，看來自強不息才會有立足機會呢！
記者、部份攝影：黃凱穎
萬事得汽車（香港）有限公司執行董事張錦興先生表示，當政府公布新預算案後，再加上中東戰爭和其他因素影響，車市嘅買賣可謂全完停頓，就連行汽車陳列室嘅人都大幅減少；據佢估計，如果新稅制落實的話，汽車銷量將會下跌兩成多。其實，現時有好多消費者係想睇定啲，以按兵不動嘅心態嚟睇車價嘅升跌。雖然部份車行會以舊價出售2002年嘅現貨作招徠，但咁樣會拉低整體利潤水位，所以相信只係短期嘅對策而已。
環宇汽車有限公司董事總經理李之盛先生表示，車價受稅制影響而大幅提高，並唔係要車主多付數萬元嘅問題，而是價值觀不同；現時嘅消費者袋中並唔係無錢，而係無信心消費，故此係信心問題重要過金錢。喺現今嘅經濟環境下，就算用錢買咗一件心愛嘅物品回家，都未必代表因消費後而感到開心，如果係咁的話又點解要消費呢？據佢從事二十多年汽車業嘅經驗估計，呢次增加首次登記稅後，消費者需要最少三個月甚至半年時間，才可接受同習慣，惟整個汽車行業嘅銷售，定必有所下跌。
仁孚行營運總裁李達成先生表示，現時消費者意欲受到影響，雖然政府表示消費者會慢慢習慣，但事實未必如此，因為消費者並唔係覺得車價太貴，而係感到唔值得畀太高昂嘅稅款購車呢！
李先生認為政府初時估計，車主好快會習慣加稅後嘅新定價，但車主喺買車時會有預算，車價一旦提高，佢哋會考慮較低一級型號，唔會願意買一部佢哋認為稅款過高嘅汽車；車價代表汽車本身價值，而稅款就係一個附加費，太高的話消費者會覺得不大合理。就以平治車系為例，車主可在同款系列上選購不同級別型號，以迎合自己嘅預算。
合迪汽車董事總經理葛創基先生表示，自從政府公布新一年財政預算案、並大幅增加汽車首次登記稅後，汽車市場就出現咗兩類顧客，一係響財政預算案公布前定咗車嘅車主，佢哋會抱住一個觀望態度，待政府有決定後才考慮是否繼續購買；而另一種係等待優惠嘅客人，呢類車主會期待代理喺呢個市道低迷期，推出價錢具吸引力嘅車款，但由於呢類減價車唔多，所以相對呢類顧客比例亦有限。佢相信未來汽車代理會減少存貨，降低經營成本，以保持一個平衡嘅利潤，但新車款式定必銳減，定車期亦會因而延長。
據香港右軚汽車總商會創會會長羅少雄先生表示，現時香港已登記嘅獨立車行超過800間，水貨車行於去年共售出8,356部汽車，如果新稅制獲得通過的話，水貨汽車銷量可能會大幅下跌超過三成；另外，大幅增加汽車首次登記稅後，除會直接影響汽車銷量外，重會影響其他與汽車有關嘅行業，例如：油站、停車場、汽車零件店、汽車維修、汽車護理及保險等等，因為購買新車嘅人少咗，呢啲行業嘅利潤定必會直接受到影響。
羅先生指出，由於水貨車行唔似代理咁，需要每次輸入一定數量嘅車輛，所以可單一引入不同車款及車種；其中改變最大會係中價車，呢類車嘅車價多數響15萬至50萬元內。傳統水貨車以頂級版本或特別型號作賣點，但如果推行新稅項後，再加上其他外來因素，例如日圓或歐元兌換率上升，中價車嘅售價會比現時貴約40%。
水貨車一向以現貨為賣點，喺新稅制下，貴價車嘅銷量亦會大幅下跌，存貨量亦會減少好多，特別係接近80至90萬元嘅車種，更可能需要定貨㖭！現時各車商惟有喺服務方面多下工夫，令客人覺得物有所值。
近排，香港汽車銷量直線下滑，除咗市民消費意欲低之外，另一個原因會係大部份準買家，響預算案未落實下，恐防畀多咗車價無得退回。然而，據知響呢段時間買入新車，若然財政預算案落實有寬減的話，政府會安排經由運輸署，將車價差額退回畀車主㗎！
筆者響是次專訪中，分別代表仁孚行及身兼汽車商會主席嘅李達成先生、英之傑集團嘅張錦興先生、森那美集團嘅李之盛先生，以及大昌行嘅葛創基先生，均表示雖然曾與政府官員反映過新一年預算案中車稅加幅過高，加上經濟、戰爭及非典型肺炎事件等外圍因素影響，會打跨香港汽車業，例如會有車行倒閉或更多汽車從業員失業等等；另外，汽車新稅項會嚇怕想換車嘅車主，喺汽車銷量大幅下降嘅情況下，亦會直接影響政府庫房收入。屆時政府喺汽車業所收得的稅項，分分鐘比現時還要少，肯定會換來反效果。不過，政府並未有對呢啲觀點同事實作出實質回應。對於政府一意孤行，佢哋都覺得無可奈何。
而另一群缺乏大集團支持嘅代理商，正醞釀向政府當局反映新稅制下打壓汽車業前景嘅問題，究竟香港汽車商會內部會否有共識向政府爭取？而未來幾萬名汽車從業員嘅生計及前景又會係點呢？而財爺預計響新車首次登記稅多收七億嘅如意算盤，又能否打得響？大家真係要拭目以待喇！