八方前幾日喺度取笑特首董建華，話非典型肺炎幫咗佢一大把，代價巨大，不過特首唔使憂，都係由佢手下幾個司局長孭鑊。
第一個當然係楊永強局長，佢唔敢將事實第一時間公開，又遲遲未將威院呢個大缺口補漏，冇耐社區不斷爆發SARS個案，呢筆帳港人都好難忘記。不過佢喺打SARS呢場仗中勞心勞力，又主動申報買咗架新車，算佢啦。
第二個慘情人物，就係專責解決失業嘅葉澍堃，加上佢老哥管嗰幾瓣，例如係旅遊業等都係重災區；原先力推一拖三輸入大陸勞工方案，家陣都唔知係香港怕內地輸入病毒，定係人哋驚來港受感染，你話點會成功？剛剛瑞士又唔畀港人去參加國際鐘表展，連唐英年局長嗰叠都燒埋。
煲呔曾重慘，被老董欽點做疫情應變小組阿頭，肯定唔係優差；之前佢份人口報告猛叫人生仔，𠵱家邊個敢有BB呀！總之呢單肺炎，搞到特區政府頭頭失晒預算，唔知點收科。
傳真︰2623-9278
電郵︰