張國榮跳樓自殺，遺下字條，第一個字就係Depression，一字千鈞，真係令人感覺好depressed。過去一年幾以來，左丁山聽到一啲可靠消息，就係張國榮患上精神抑鬱症，由麥列菲菲教授治理，呢個係長期病，正正式式係「心病」，好難靠食藥嚟醫好，一旦受到某些因素（例如男女感情或男男感情）困擾或者太過懷念過去美好時光，或者突然由一帆風順跌入逆境，都會產生心理突變，視死如歸。
四月一日，全香港做晒愚人，俾一個中三學生玩弄到貼地。
左丁山是日下午，收到唔少電話，都係關於疫埠，到超級市場掃貨之事，初初笑到捧腹，笑人哋儍，後來真係笑唔出，有一種為香港悲哀嘅感覺。到咗七點半，坐的士經過文華酒店，好似睇到有人維持街上秩序，重以為酒店有ＶＩＰ開會，點知過咗紅磡隧道，就收到大記者電話：「張國榮喺文華跳樓，死咗」。左丁山話：「喂，愚人節就快過去喇，唔好玩我。」大記者話：「你返到屋企睇電視啦。」
睇完電視，成個人愕然、茫然，覺得好depressed，張國榮好好哋點解要自殺？香港人點解要去搶購食米？跟住有線電視直播淘大花園E座居民搬遷去度假村，與其他人隔離，畫面所見，現場亂作一團，成個大禍臨頭咁嘅場面。嚡，香港人幾時會淒涼成咁！呢晚冇心機同老婆傾偈，Depression。