董建華治港不足六年，已經將香港搞到人人自危，學生冇學返，生意冇得做，屋企唔敢返，出埠唔受歡迎，都算佢好嘢。唔怪得最近網上流行一篇未來會考生必讀文章，將老董形容為古代嘅昏君，重話「喺建華末年，老董以二十三條治國，喺香港推行高官不負責制，官員沉迷國寶，荒淫無道，肺炎肆虐，民不聊生，導至速亡，史稱《建華之亂》。」
呢啲預言式嘅文章，中國人最好此道，但事到如今，八方亦只望港人福大命大，執番條命仔，他日再戰江湖。
講番老董，雖然八方見佢從不聽衞生署忠告，成日同人握手，喺公開場合又唔戴口罩；但原來每當佢同啲司長局長喺政府總部開會，都會戴番個口罩，守足規矩，唔知係咪怕被楊永強局長呢啲高危人士感染？至於董太，最近無乜曝光機會，冇人知佢戴住口罩重會唔會發表Complain高見。
所謂世態炎涼，幸好重有啲不怕非典型嘅偉大朋友，烏克蘭總統早兩日如期率團訪港，重喺禮賓府同老董以及一眾高官同枱食飯，相當高興。列昂尼德總統前日更飛咗去北京見新領導人，世衞組織講乜佢唔理，咁勇敢嘅國家領導所餘無幾。
傳真︰2623-9278
電郵︰