星期二中午時份，一位老友記到合和城，只見百佳門外，有人買食物、日用品多到要用一架貨van裝貨，老友記心諗：「買咁多嘢，屋企夠唔夠地方擺呀？」忽然間聽到後面有OL講電話：「唔係呀？下晝香港會變疫埠？」老友記聽咗為之一驚，急忙打電話問一位消息靈通嘅經紀，經紀話：「市面就係咁樣傳來傳去，可能下午政府會宣佈？」
謠言滿天飛之下，老友記都想衝入百佳買番一箱公仔麵，但見裏面人頭湧湧，收銀處排長龍，於是知難而退，改而打電話問左丁山：「喂，香港變疫埠喎，真唔真，信唔信得過？」左丁山喺八三年九月黑色星期六，冇去百佳搶廁紙，今日點會去搶麵，大聲喝住老友記：「唔使咁驚，就算真係，食物日用品一定唔會短缺，唔好人搶你又搶。」
香港人享受太平二十年，新一代更加難以忍受痛苦，捱苦，一見「沙士」打到嚟，已見人心浮動，實在係驚過龍，亦係對董特首領導班子完全冇信心嘅表示。我哋好同情淘大花園E座嘅居民，希望佢哋健康正常，但在隔離第一日，已有一位小姐打電話到電台投訴：「我冇洗衣機，每日拎衫出街洗，𠵱家唔畀我出街，我唔識洗衫㗎！」左丁山聽到為之失笑，冇洗衣機，用手洗衫得唔得？左丁山冇錢請菲傭，冇錢買洗衣機之時，每個星期六日就用手洗衫洗到腰痛，我阿媽更加洗衫洗咗幾十年，真想唔到𠵱家竟然有人如此投訴也！