早排股價一度急升嘅億勝生物科技（8151），噚日終於爆煲。好彩小初早前聽經紀陳話冇手痕，如果唔係，今次將會好頭痕，真係要請經紀陳飲茶。
億勝噚日勁跌45.3%，收0.076元，成交金額219萬元。
經紀陳噚日將唔好玩億勝嘅原因娓娓道來。佢話首先與公司本身無關，主要係有個炒家，唔知循乜嘢途徑得到一大手億勝股份，而億勝股價波動，主要同呢位大哥有關。
至於呢位炒家名聲如何，同埋有冇銀両，其實大部份行家都心裏有數。不過，有部份行家為求有生意做，就算明知對方嘅底蘊，亦照接Order，希望賺番多少佣。據講隻股早排成交咁大，就係有人周圍借孖展交波仔。
雖然隻股亦曾經炒起過，但炒家始終散唔到貨，重搞到愈嚟愈水緊，加上最近又有證券行宣布停業，影響之下隻股終於玩笨豬跳。
慕容小初