日前亞視為悼念張國榮，播映了他生前接受訪問的片段，張國榮細訴與家人關係疏離，自歎與父母無緣，並透露小時候曾經憎恨父親，並在其舖頭偷錢來買東西。
為了悼念張國榮，日前亞視播出《風繼續吹─張國榮》，節目輯錄張國榮接受黃霑、蔡瀾和倪匡主持的《今夜不設防》和林建明主持的《星空下的傾情》等訪問。張國榮細訴與家人的疏離關係和入行前的辛酸史。
家境不俗的張國榮，在英國留學回港後不想依靠父母，十九歲那年以賣鞋和賣牛仔褲來自力更生。張國榮在訪問中說：「嗰時讀完大學一年班，老竇因為飲酒飲得好厲害，一邊身癱咗。老人家驚死，尤其我係細仔，返咗嚟又唔畀我走。嗰陣住慣英國，同屋企人住覺得好怪，好想搬出嚟住，所以就搵錢，先發覺原來香港搵錢好艱難，我試過喺跑馬地賣鞋，八百蚊個月，賣咗兩個禮拜，再去賣兩個禮拜牛仔褲。」
張國榮及後在偶然機會下投身娛樂圈，他說：「之後有個同學話麗的電視有歌唱比賽，嗰時又硬頸，唔想再畀老竇養。點解我咁錫六姐，因為我入行都係靠六姐，嗰時報名費五蚊，六姐畀夠二十蚊。」
張國榮續說：「我同爸爸媽媽係冇緣，我呢一世人冇同我阿媽住過半年。我記得有一次真係可以同我阿媽溝通嘅，係我重好潦倒嘅時候，我同我愛人散咗，之後揸車返屋企一路喊，我阿媽見到我喊，佢就敲門同我講『阿仔你唔好咁，你咁我好傷心！』我聽完重喊得大鑊，至少感覺到我阿媽係care嘅。」
張國榮續說：「我爸爸喺我印象中係一個好出名嘅裁縫，係個天才。不過佢冇乜傳到畀我，剩係傳咗打煲呔嘅伎倆畀我。我有兩個阿媽，我覺得佢係一個好不負責任嘅老公。嗰時有一輪我好憎我老竇，去佢舖頭偷佢錢，等佢冇錢使，我就攞錢去買嘢食，細個時有呢啲得意嘅思想。」
張國榮與父母關係疏離，但他十分崇拜大家姐張綠萍，張國榮說：「我係唯一一個去外國讀書，其實大家姐讀書最好，但因為老竇係嗰啲舊頭腦，女人唔使讀好多書嗰啲，咁我家姐終於喺半工半讀下出人頭地，我好崇拜我家姐。」
撰文：羅慧敏
