瑞典紳寶車廠於早前舉行嘅瑞士日內瓦車展上，展出咗全新9-3Convertible開篷跑車，當時曾惹來不少車迷注視；皆因新車擁有極富跑意嘅造型外，性能表現亦見不俗嘛！不如今日就趁新車喺今年八月推出前，一齊嚟先睹為快啦！
記者：李志強
新版9-3Convertible嘅車廂布局亦見有一份吸引力，不但空間闊落之外，一雙承托力十足嘅前排仿桶形跑車座椅，亦令乘坐舒適度倍增；而後排乘客亦能享受闊落乘坐空間，就連進出車廂時亦見方便呢！設備配搭方面，除電窗、電鏡及中央門鎖外，另外重有原廠冷氣及高級音響組合，當然唔少得重有多個安全氣袋配搭，以保障車上乘客安全啦！
廠方特別為新車安排有兩台引擎供用家選擇，雖然兩者同屬2.0公升引擎，兼且同樣附有Turbo裝置，但Turbobar數卻有所不同，其中2.0t為0.70bar（馬力：175ps/5500rpm，扭力：27.0kgm/2500-4000rpm），而2.0T型號則為0.85bar（馬力：210ps/5300rpm，扭力：30.6kgm/2500-4000rpm），從而迎合喜歡不同性能表現嘅用家；然而，出色懸掛系統附以剛度十足嘅底盤配搭，行車循迹性之高亦能予人有莫大信心。
新版9-3Convertible造型與硬頂版一樣，但改用電動軟篷頂後，顯然變得更富活力感；而軟篷頂開關時只需輕按控制鍵，便可於20秒內完成整個過程，使用時可謂十分方便。就連流線型車體設計，亦令車子風阻系數僅得Cd0.34嘅數值，較舊有型號來得更低，有助增強性能表現；除此之外，廠方更為新車安排有多款特別顏色配搭供用家選擇，從而令新車倍見突出呢！