新特蘭𠵱家要護級成功重難過登天，雖然領隊麥卡菲、射手菲臘斯等都重向外界講未放棄，只可惜係連上天都唔幫新特蘭咁，偏偏喺呢個時候傷埋前鋒費奧，認真黑到痹。
費奧日前幫挪威國家隊踢外圍賽，對手只係歐洲魚腩之一嘅盧森堡，但佢就唔好彩比賽期間拉傷腿肌，預計要休息三個禮拜，呢個消息對新特蘭打擊頗大。
費奧加盟後表現無疑一直麻麻，之不過新特蘭現時求贏波，前鋒等重要過後衞，少一個前鋒等於少一個爭取贏波機會。本報英超榜首名家華度都話繼續宜捧新特蘭對家，而我求大俠都惟有祝願佢哋唔好打破屈福特個歷來英超聯最低分紀錄啦！
唔少過氣球星都嚟中國搵食，連加斯居尼都投身中國甲B聯賽，但係由中國轉返去歐洲嘅外援少之又少。些路迪領隊奧尼爾日前睇保加利亞對愛沙尼亞歐洲國家盃外圍賽時，就睇中咗保加利亞前鋒揚戈維奇，當知道佢原來效力中國甲A大連實德時更嚇咗一跳。我求大俠知道揚戈維奇最近喺大連唔多受重用，怕且奧尼爾有機會執到平貨。
唔少過氣球星都嚟中國搵食，連加斯居尼都投身中國甲B聯賽，但係由中國轉返去歐洲嘅外援少之又少。些路迪領隊奧尼爾日前睇保加利亞對愛沙尼亞歐洲國家盃外圍賽時，就睇中咗保加利亞前鋒揚戈維奇，當知道佢原來效力中國甲A大連實德時更嚇咗一跳。我求大俠知道揚戈維奇最近喺大連唔多受重用，怕且奧尼爾有機會執到平貨。
梳打埠自從為中國甲A聯賽開盤後備受關注，而今個星期又推新盤，開埋瑞典聯賽，加埋原本嘅英超聯、西甲，同埋日本職業聯賽等，星期六加埋有六十五場波讓波友選擇。我求大俠提醒波友，第一場開盤嘅瑞典聯賽由蘭斯干拿對哥登堡，今晚八點開波，兩隊上季成績都一般，哥登堡只憑附加賽先成功留級。
朗人氣急升，最緊張嘅係愛華頓領隊莫耶斯，當佢知道艾歷臣擬帶朗尼出征南非時，想艾歷臣棄用佢，免小將打殘喎。英軍友賽喺下月二十二日進行，相信朗尼隨隊都唔會踢足全場，如果跟愛華頓下月訪華踢兩場，上陣時間隨時多過國家隊。其實，莫耶斯唔使咁樣保護朗尼，反而應留意佢嘅操守，唔好學加斯居尼飲酒減壓重好啦。
德國老將艾芬保，最近同禾夫斯堡鬧翻，會方重同佢提前解約㖭！英國記者即刻去問保頓領隊艾拿迪斯有冇興趣搵呢件老將返嚟護級，點知艾拿迪斯反而叫記者唔好講廢話！問心嗰句，艾拿迪斯又真係鍾意吼啲又老又過氣嘅名將，冇問錯你喎！
逢周六、日見報