佘詩曼是愛狗之人，日前她為寵物雜誌拍照，抱着西施犬表現得愛不釋手。阿佘表示她最愛乖巧的雪橇犬，因為這樣才脗合她的性格，相處會更愉快。
佘詩曼日前接受寵物雜誌《犬月刊》訪問，她跟兩隻雪橇犬和一隻西施犬拍照。阿佘把西施犬當BB一樣，抱高抱低，愛不釋手。
阿佘表示從前曾飼養過一隻西施犬「囡囡」，自從她加入娛樂圈，工作時間不固定，所以被迫割愛，把「囡囡」送給朋友，阿佘說：「聽講『囡囡』已經做咗媽媽，佢嘅主人好錫佢，我都戥佢開心。」
阿佘續說：「以前我好錫『囡囡』，得閒就帶佢去散步，我重會親自同佢沖涼，將佢洗到香噴噴，攬住佢好開心。不過『囡囡』好頑皮，佢唔係好鍾意沖涼，見到我拎住啲沖涼用品，就會掉頭走。」
斯斯文文的阿佘挑選愛犬時，首要條件是要乖巧，她說：「我揀狗要佢性格純良，同我一樣。不過其實我好鍾意雪橇犬，因為我鍾意呢種狗嘅毛色，成日睇電影見到佢哋拉雪車，覺得呢種狗好勤力、好純良，將來有機會我都想養一隻。」
問阿佘可會考慮飼養狗隻陪伴自己，她說：「我暫時都唔會養住，因為養狗一定要有時間陪佢哋，否則對佢哋好唔公平，如果係咁，我寧願唔養住。」
撰文：比華利