歐洲行政房車市場競爭可謂相當激烈，繼德國平治車廠推出新一代E-Class後，份屬同鄉嘅寶馬車廠，亦決定於嚟緊7月，推出全新第5代5系房車以示抗衡；新車除擁有更富豪邁感嘅造型外，多項豪華配備更係焦點所在。睇嚟當新車正式推出時，又會引起一場市場角力戰呢！
記者：鄭達基
屬第5代嘅寶馬5系房車，初推出時只有配用2.0公升引擎（170匹）嘅520i，以及配用3.0公升偈（231匹）嘅530i型號，到10月時又會推出配用2.5公升引擎（192匹）嘅525i，以及4.4公升V8偈（333匹）嘅545i㖭！另外，由於車身及底盤不少部份改用鋁合金作材料，比舊有型號輕出65kg，加上引擎附有bi-VANOS技術，故此除動力輸出更強勁外，就連耗油量亦較前有所下調。而用家更可選配多套先進系統，如DynamicControl、ActiveSteering等等，以增強車子嘅操控表現及行車安全性。
當大家初次接觸到全新第5代5系房車時，相信都會覺得新車唔多唔少帶有同廠7系房車嘅韻味，望落份外覺得豪邁吸引；用家除可選配附有隨軚盤轉動方向，而調校照射範圍嘅bi-xenon頭燈組合外，附以BrakeForceDisplay功能嘅尾燈組合，除用上LED作組合外，迫力燈更可隨着煞車力度而增加發光面，以便後車司機能作出適當反應呢！
新車不僅造型有變動外，就連車廂布局亦有好大改變，當中較前明顯有所增加嘅空間感，以及前後兩排承托力甚豐嘅座椅，已教人印象難忘；而帶有跑味嘅表板布局，亦予人有耳目一新之感。與7系一樣，新一代5系亦裝有i-Drive系統，並屬第二代設計，駕駛者可透過設於前排中央手枕嘅控制器，去控制車上各項設備，可謂十分方便。到2004年時，選購5系嘅用家，更可為座駕選配與現有7系房車一樣嘅ActiveCruiserControl，當探測器探測到車子與前車距離接近原先設定距離時，便會自動減慢車速，以便將兩車距離拉遠，隨後電腦更會按照原先設定嘅車速繼續行車，毋須再作任何設定，認真方便。.