個市市底淡淡哋，忽然彈升174點，真係唔易估中。美英聯軍據報控制巴格達機場，成為最好消息。前日啲Put輪耀武揚威，Call輪成隻死狗，昨日調轉，Call輪意氣風發，Put輪死火。
長實Put輪9567，前日升53%，成為阿1輪王；昨日跌47%，則成為死火榜上阿1。隻輪下個星期玩完，現價9.7仙，溢價0.2%，槓桿率45.5倍。
長實（001）昨日彈升1.30元，隻輪冇咗接近1半，若然正股跟住散番1.30元，隻輪又有權升番1倍。但究竟長實係再升1.30元或跌番1.30元，好難估。
昨日威水輪中有隻太ACall輪9475，因為正股（019）升80仙（升幅只係2.5%），隻輪由5.8仙飛上8.4仙，咁就彈跳45%，有58球易手。炒股票，揸1年都好難搵隻有咁嘅升幅，揸隻輪就24小時搞掂。
9475大上大落，如果覺得好易搵錢，不妨睇番轉頭。兩星期前唔好彩揸咗，原來即使昨日彈番，仍然要慘蝕74%。
隻輪下月杪到期，表面溢價2.8%，計埋夠鐘前正股除息90仙，實際溢價係5.7%，即係話，個幾月內，正股升幅如果唔1.80元以上，買隻輪就要輸錢。
章盛