市場噚日又再傳出美伊之戰好快打完，重傳到美國開始向本身及盟國企業分派重建伊拉克工程合約，刺激美股場外期指大升，再一次令港股在周末前夕，出現非典型挾淡升勢，恒指大升174點，收報8822，成交66.55億元。
不過，唔少淡友於高位再接再厲開淡倉，期指收報8767，升180點，低水55點，未平倉合約接近6萬張，大戶仍以淡倉為主。
港交所（388）兩巨頭玩辭職，抗議上市審批權被奪，股價不但未受影響，更大升2.8%，收報9.10元。港府今次咁做，擺明要剃港交所眼眉，李業廣算係有頭有面人士，點會啞忍任人漁肉，唔劈炮就勢係假。
其實香港正處多事之秋，港府管治威信又差，實應萬事以和為貴，不宜事事硬碰硬，吓吓以高姿態處事，今次真係唔知點收科？不過，最令阿虎奇怪係李業廣等人本來係董建華班底，呢一劑係因為大家溝通不足，還是阿董已經眾叛親離？
國泰（293）又再減航班，載客量之減幅由4%增至14%（相當於航班減幅由10%增至24%），反映國泰受肺炎潮影響仍未見底。此股早前遭洗倉，由11元跌至9.50元水平後企穩，如今國泰再縮航班，相信好易嚇到芬佬再沽貨，質穿8元亦唔奇。黑客話，有歐資行已準備再出報告叫芬佬沽貨。
科達集團（673）擬配售新股予國康，企圖沖喜一下股價，點知最後因無法證明配股交易毋須中國證監批准而告吹。有消息話，雙方繼續尋求證據，以圓科達引入策略性投資者之夢。不過Cookie話呢類證明好難獲取，有關交易相信有排都搞唔掂。
阿虎