受到香港傳統酒樓飲宴文化嘅長期「教育」，好多人一講起食翅，就好似世間只有上湯一款！小記最近逛咗一趟魚翅酒家，感受到一份全新「翅」激，原來魚翅竟然可以用蘋果煮、灌金茄西湯，甚至用上黑菌鵝肝、放入茶杯裏飲……數吓數吓，食法不下十數款，呢個世界搞成咁，及時行樂，食咗先算啦！
記者：朱崇德 攝影：陳陶鈞、朱崇德
ImageGirl：Karen
逢星期一至五刊出
做魚翅做到中外聞名嘅袁兆英，自幼家中就辦有魚翅廠生意（必富魚翅廠），所以不論在魚翅入貨、地區產量分類的優劣，以至炮製方法都可以稱得上係專家。
首先在魚翅選貨方面，就已經優勝過好多酒家，酒樓重喺80年代初開辦，累積多年經驗，做魚翅技巧當然高幾皮，最重要係所有嘅魚翅來貨，都係由家族經營嘅魚翅廠包辦，所以由未打沙嘅魚翅原材料，到製煉成魚翅，以至經廚師精心炮製放入大家口中，都係一條龍由袁氏家族生意一手包辦！
酒樓更是卧虎藏龍之地，就以來到酒樓九個月嘅新廚師Roger為例，被公司派作參加中華廚藝學院全國性廚藝比賽，首度參加賽事就贏得了香港參賽代表身份，而且更在全中國各省代表的群雄中，以一味「松鼠鮮鯇魚」，奪得總決賽的亞軍！
至於有二十多年經驗嘅廚部主管林東喜以及西廚部負責人Kelvin，差唔多每隔一段時間就會有新魚翅菜式推出，至今已累積不下有三十幾款以魚翅為題材嘅菜式，食法種類之多變，「可以大膽啲講句，香港真係無酒樓做到我哋咁多款式！」
先將黑菌鵝肝製成Mousse狀，當食用時才將之混和入湯翅內，黑菌鵝肝獨有鮮香味，混和入排翅食，感覺味道特別濃烈！
綠色湯底原來用咗新鮮嘅丸豆仁（類似蜜糖豆），有一種好強烈嘅Creamy感覺，再加上鮮滑三文魚的玫瑰裝飾，真係齋睇樣都滿分！
用鮮嫩金茄去核去皮炒至微爛，做魚翅湯底，有啲似羅宋湯嘅惹味，不過味道唔會太搶！
好似甜品夠清潤
有少少似西式嘅甜品焗蘋果！做法都係大同小異，不過內裏餡料就改用中式魚翅，蘋果嘅獨有香味同清潤感覺，深深滲入魚翅之內，入口感覺好舒服。
南瓜內藏大粒雲吞
新鮮小南瓜製湯入翅，並用上有劍花之名嘅霸王花，再將一隻大雲吞放正中間。原盅南瓜燉翅，簡直有冬瓜盅異曲同工之妙，最正係粒雲吞，食完翅湯再一口放入嘴，滿嘴馥香。
西藏香料濃鮮味
唔好大鄉里到以為將成株鬱金香放落去煮！其實係將鬱金香嘅根部磨成汁，再加入新鮮蟹黃翅之內。據大廚講，鬱金香根其實係西藏香料嘅一種，入口甘甘哋，有啲似食甘草，不過特別能引發蟹黃翅嘅濃烈鮮香之味！
源嘉芬（中）及朋友：我第一次同朋友上嚟食，都係為咗一試佢啲魚翅，啲翅大大梳，真係好正！驚唔驚有肺炎？呢度啲位隔得咁開，我諗應該無問題嘅！
地址：鰂魚涌太古坊華蘭路濠豐大廈2樓
電話：22505022