對於奧雲嚟講，禮拜三對土耳其場波簡直係噩夢。佢唔單止踢得差，鋒芒俾朗尼掩蓋，重因為背傷響下半場初段被迫退下火線，有可能踢唔到禮拜六對紅魔場聯賽大戰。曼聯方面，雖然無球員響呢輪國際賽受傷，但好多個都搏晒老命，體力消耗好大，所以禮拜六早場雙「紅」大戰真係殘對殘！
奧雲仔賽後話，佢背脊響上半場已經俾人撞親吓，應該半場退下火線，但佢死頂踢多陣終於令背傷加劇。鬼叫人哋朗尼仔踢得咁搶鏡咩，佢唔頂硬上都唔得，真無奈。好嘞，佢受傷，隊友希斯基又未好番晒，利物浦禮拜六前線兵源告急。不過曼聯碧咸、史高斯、畢特、雲尼斯達羅、蘇斯查等幾件主將都響禮拜三為所屬國家隊踢足全場，得兩日多少少時間，唔知夠唔夠回氣呢？
我求大俠前晚睇英格蘭對土耳其場波，覺得除咗小朋友朗尼踢得唔錯之後，其實後備上陣入波嘅華素爾同埋土軍嘅艾比耶都踢得唔錯；加埋入咗維拉雪櫃嘅柯碧克又為瑞典省兩粒，維拉有啲咁嘅好球員，計正無理由戰績咁曳㗎？我就唔識求驗嘞，讀友有興趣者不如打電話去問吓佢哋領隊泰萊。
意大利足總宣布意乙由○五至○六年開始改制，二十隊分南北地區兩組角逐，兩組聯賽前列隊伍最後再進行附加賽爭取升班資格。我求大俠一聽就覺得呢個安排係想平衡國家足球勢力。都啱嘅，𠵱家南部球會唔單止積弱，球迷搞事又特別多，真係烏煙瘴氣，改制後南部球隊升班機會變相大咗，有融和地區同埋安撫作用。
早幾日車路士公布虧蝕千幾萬鎊，連高層都話好擔心隊波嘅財政狀況。其實藍戰士最大問題係球員薪酬太高，睇怕季尾會向啲高薪球員開刀。隊長迪西里已經三張四，狀態走緊下坡，佢好明顯知道形勢不妙，所以就話𠵱家踢波係講興趣，唔講錢，話明減薪都無所謂。唔知佢呢招自降身價可唔可以令佢逃過被開刀命運嘞。
NBA溜馬嘅壞孩子阿達斯噚晚贏騎士嗰場波又有新搞作，佢俾敵方球迷用銀仔掟中之後，即刻向觀眾席做粗口手勢，但賽後就解釋自己只係同球迷開玩笑。用粗口開玩笑？阿達斯唔用腦諗吓自己近排嘅「底」幾差，今季已經因為紀律問題被罰停賽十二場，唔通又想近一、兩日內再要坐波監休息吓！
逢周一至周五見報