現代女性能撐起半邊天，原來樓市重緊要，唔止半邊天。美聯物業調查報告話，今年首季一手樓買家，女性比例有五成四，首次多過男性，比舊年同期嘅五成多咗四個百分點。估唔到呢個現象重對近排嘅樓市有好大影響。
美聯首席分析師劉嘉輝指出，近期非典型肺炎爆發，樓市深受影響，其中一個原因係同買家性別有關，因為女性買家入市態度變得謹慎好多。佢補充，女性揀樓，好注重單位同屋苑嘅衞生環境，價錢反而係其次。唔少女性要照顧父母，或者係子女，對衞生要求高啲好合情理。
劉嘉輝解釋，近年女性買家持續增加嘅原因，係女性喺家庭嘅地位日益提高，所以好多時買樓，落名登記做業主嘅都係女性。而且女性收入同男性拉近，置業能力增強亦係原因之一。
睇嚟，發展商設計樓盤同宣傳時，都要多啲從女性角度出發，先至可以爭取到呢批買家。
疫症肆虐，人人都盡量唔出街，但商業活動又唔可以停止，咁點算呢？腦筋轉得快嘅生意人，諗到用視像會議，公司高層仍可以繼續開會，又唔使擔心因接觸而感染病毒。
美聯寫字樓部營業董事黃漢成話，具備高科技設施嘅商業大廈最着數，估計租務交投會多三成，租金可以喺短期內升百分之五到一成。點解咁樂觀，因為有批客戶，開始查詢附有高科技設施嘅商廈租務行情。邊啲商廈會係受惠者，佢話中區嘅中環中心、灣仔中環廣場同鰂魚涌太古坊等。
雖然全港已武裝起嚟，對抗非典型肺炎病毒，但似乎冇乜新進展，大家都有啲心灰意冷。近排不「避炎」嘅長實，就如常搞記者會，繼續推廣樓盤，喺呢個突然轉靜嘅市況之下，佢哋都算係最勇嘅發展商。樓市無乜焦點新聞，雖然佢哋公布嘅消息唔算多，但總算有料到。
負面新聞接踵而來，長實話，個個都情緒低落，更加要關心吓身邊嘅人。表達方法有好多種，噚日佢哋喺記者會度，向傳媒大派玫瑰花以表心意。
而近排肺炎事件影響市民出外睇樓活動，長實就話會加強樓盤示範單位同售樓處清洗工作，並限制入場人數。
傳媒行業近年不斷收縮，出路似乎愈嚟愈窄，但地產代理行不斷羅致傳媒人加盟。
中原地產啱啱請咗資深傳媒人鍾乃文，聽執行董事張奕威講，佢會負責市務推廣，為樓盤度橋促銷，同埋提供意見做廣告宣傳等。鍾乃文以前曾加入過美聯一段短時間。
聽中原講，近一年公司總共請咗三個傳媒人；而美聯集團就請咗四個。不過，兩家公司其實重有啲做咗好耐嘅員工，以前都做過傳播機構。
肺炎病毒不斷擴散，好多活動都要取消，發展商搞嘅記招，近日都少咗，返大陸嘅記者睇樓團，更買少見少。
今個禮拜，由香港出發去內地參觀嘅記者團，都已經取消。置業國際本來今日帶記者團去參觀深圳布吉大世紀花園，日前宣布取消，而下個星期，天安中國去上海睇樓盤嘅記者團，亦啱啱取消。
蘭西
電郵地址：
