經紀黃噚日推介旭日企業（393），皆因隻股改咗年結日，將在4月底前，公布截至2002年12月止9個月業績，有望在此段期間炒業績。
旭日先一排唔知係咪因為同一隻外國牌子搞合營，股價一度高見2.10元，但好快就回落。噚日升0.01元，收1.80元，成交唔夠100萬元。
經紀黃話，呢幾個月，唔少華資或外資證券分析員，都出報告唱好旭日，故此有游資炒上唔出奇，但芬佬睇長線，家陣回落正係佢哋吸納之時。
噚日有間歐資證券行出報告，估計旭日02年9個月業績所錄得嘅經營盈利，大約相當於01年全年，若以同期9個月比較，則多30幾個巴仙。不過，旭日亦會就東南亞廠房作出些少撥備，但派息比率可觀，所以覺得吸引。
另外，經紀陳經常推介嘅華瀚生物製藥（587），唔經唔覺已升上1.22元新高，據聞公司稍後將有消息公布。
慕容小初