每年四、五月都例靜嘅Game界，今年因為肺炎殺到而靜上加靜，搞到平時人頭湧湧嘅Game場更加死吓死吓，強如黃金、高登等大場亦冇好日子過，好多舖嘅生意都跌到「巴巴聲」，問番啲Game舖老闆都話好多客都係快手快腳買完Game就走人，但亦有唔少新客特登買機玩，話晒喺屋企打機至安全嘛！不過以前好多新客跟機必買嘅遊戲，好似《WINNINGELEVEN》咁，就真係少之又少，反而𠵱家最多人買嘅就係《機戰》等要長時間煲機嘅RPG、SLG遊戲。
等到頸都長嘅《SoulCaliburII》，XBOX版行貨今日終於登陸香港，頭批重會有日本都冇嘅特典手表送，遊戲本身無論畫面、聲音方面亦比PS2同GC版本強勁，行貨定價$299，相信有機冇理由唔買嘅。XBOX行貨主機加送SEGA兩大勁作嘅BoxSet亦已推出，重係唔加價照舊賣$1,599，如果一次過買埋《SoulCaliburII》，全套主機加埋3隻Game都唔使$1,900，真係抵到飛起。今個月中《KUNG-FUChaos》呢隻喺美國勁爆嘅遊戲亦會有行貨推出，真係唔怕冇Game玩。
等咗好耐GBASP220V嘅行貨，上星期無聲無息咁上咗市，有呢個220V行貨，叉電就唔使配多個火牛，方便得多，市價約$850左右，想加入GBASP陣營，享受發光靚芒兼型仔外形嘅朋友，𠵱家就係時候。買嘅時候不妨買埋近排GBA嘅好Game《勇者鬥惡龍外傳》（$350），同專玩5秒內小遊戲考你反應嘅《MadeInWario》（$280）。