打機樂園：
三大主機真正埋身較量
徹底測試《SoulCaliburII》

自從Namco宣布同時推出三大主機版本嘅《SoulCaliburII》，一直都有好多機迷比較三者間嘅優劣，各方Fans為擁護心頭好甚至出現罵戰場面。今日《打機樂園》一於集齊三個版本，排除主觀意願，以理性為大家作一徹底測試報告，睇吓三大版本到底有咩分別。
記者：徐影龍

當年DC版《SoulCalibur》獲《FAMI通》評為滿分之作，好多機迷都相當期待II代嘅表現，Namco除大幅提升畫質外，重一口氣推出三大主機版本，可見野心實在不小。

XBOX版：聲畫效果最佳
講番聲畫提升方面，PS2版及GAMECUBE版都支援PROLOGIGII環迴立體聲，只要擴音機對應就玩到比2.1立體聲更震撼嘅音效，而畫面亦對應Progressive輸出，PS2版為525p（水平解像度），而GAMECUBE版則為480p，當然要電視同樣支援Progressive啦。今次XBOX版就最威，除有5.1真正環迴音效外，更史無前例支援720p超高解像度，達到HDTV質素，就算屋企冇Progressive電視，單以普通電視比較亦係三個版本中最靚，多邊形及光源運算紮實得多。

PS2版：三島平八獨有十連技
驟眼睇PS2版嘅獨有人物三島平八平平無奇，雖然係第一次踩過界打入《SoulCaliburII》，不過已經喺四集《鐵拳》中擔演過核心人物，新鮮感始終欠奉。不過三島平八將《鐵拳》入面嘅10HitCombo帶埋入《SoulCaliburII》，一大串指令連環打到對手唞唔到氣，相當之爽快過癮，而且重有成三招唔同嘅十連技，就算赤手空拳面對眾多古怪武器，實力都屬數一數二之強，至啱打「WeaponMaster」儲錢儲經驗值。

GC版：林克招式豐富多變
雖然GC版畫面解像度最低、冇再生俠又冇十連技，不過淨係一個林克已經夠照有突。唔計動作味重嘅《大亂鬥》，林克係首次以真正格鬥家身份參戰，表現絕對精采，不單招式豐富多變，重有齊招牌武器用，如迴力刀、弓矢及炸彈等，而且行動快速攻守兼備，亦係打「WeaponMaster」嘅好用角色，不過終極武器大妖精之劍就好難攞。值得一提係三個版本都有嘅角色Cassandra，有劍有盾十足十女裝版林克咁，同場對戰好搞笑，其他版本都可以Cassandra代替，聊勝於無嘛。

長煲模式「武器大師」
至於三個版本相同地方，基本故事、對戰模式唔講，反而「武器大師」模式（WeaponMaster）先係靈魂所在。玩家需按指定條件過關，如順序使出特殊技、連勝三人、保持不敗等，之後就按表現獲得經驗值同金錢，特定關數重可開啟隱藏人物及舞台。經驗值可提高角色能力，金錢就重要喇，可為角色添加新武器、武器圖鑑、演武片段及第三件衣裝等（林克有第四件衫），重可以不斷重打嚟賺錢㖭，雖然擺到明俾佢屈時間，不過又真係幾好玩㗎。

遊戲類型：劍技格鬥
對應機種：XBOX?PS2?GC
遊玩人數：1至2人
開發商：NAMCO
(C)1995199820022003NAMCOLTD.,ALLRIGHTSRESERVED

售賣點：DreamStore
地址：灣仔東方188商場256號舖
電話：25753285