唉！呢排香港都唔知做乜，先來財爺嘅新一年財政預算案大幅增加汽車首次登記稅，對汽車業帶來沉重打擊之後，跟住又來多單非典型肺炎肆虐香港，兼且重有成七百幾人染病，搞到唔少人寧願少出街；亦因為呢個原因，搞到福特在港舉行嘅大型會議臨時取消，以及全新萬事得Mazda62.3五門旅行車要延期推出，而令香港車市更加清靜。亞Mark最近又收到風，話早前一眾本地傳媒前赴泰國測試，並預期於四月中推出嘅新一代本田Accord，代理方面亦有意將新車推出日期押後，以避過呢場「春瘟」；好彩一眾傳媒響較早前去完泰國試車，如果𠵱家至去咪要跟足當地政府新規定，全程要與口罩為伴？