美股大升，奈何肺炎問題繼續困擾人心，亦實際影響好多行業，港股最叻升過69點，埋單仍要唔見58點。美伊開戰以來，10個交易日，港股跌市佔9日。
滙豐（005）、太A（019）、九倉（004）算係有得升，但隔晚若然揸咗，賺價都未必夠畀使用。其他重磅藍籌，大多數都冇運行，威水窩輪，主要係藍籌Put輪。和黃（013）跌90仙，Put輪9577收2.8仙，升47%，龍虎榜上排第2。過去4日9577波幅犀利，1日之間有時高低相差100%，日日有人掟幾十萬銀落去賭，到最後會點？隻輪今個月17日屆滿，行使價40元，正股現價42.80元，要跌到40元以下隻輪先至有得剩。由98年10月以來，和黃未試過低於40元，今鋪估計亦唔會咁殘，隻輪相信到最後都會作廢。當然，你可以話輸晒都係2.8仙。
滙豐升50仙，收購Household通過，隻股份大隻咗，指數基金需要按比例增持，不過貨源多咗，基金唔一定可以即時買得上去，同時大市氣氛麻麻，即使滙豐有作為都只係會好短暫。
博滙豐陰番落去，揸啲滙豐Put輪搵食，最佳對象有兩件，9578同9669，前者比較短期，得兩個禮拜玩，後者6月夠鐘，畀高少少溢價，時間方面着番數。
章盛