星期一下午，準備黃昏開會事宜、晚飯直落之際，秘書收到幾個電話，全部都話唔想出席會議。呢個時勢，無謂強逼，流會就流會啦，唔係咁大件事。之後，電話紛至，全部都係取消約會嘅。結果就係，以後兩個禮拜啲約會、工作會議、晚飯、午餐全部取消，秘書笑住講：「跟你咁耐，你都未試過咁得閒，乜約會都取消晒，你邊度有料寫稿？」
唉，冇料寫稿，不如專心刨馬，希望中三T，如果萬一跑馬都取消埋，返屋企瞓覺可也。此日中午飯局，只有三人出席，場面冷清，大公關華德話自己千祈唔病得，因為佢現時好緊張公司有乜突發事件，佢要打點公關事宜，如果自己竟然病埋一份，下屬會好吃力。啲大公司有乜應變計劃呢，似乎除咗極力推薦（highlyrecommend）員工戴口罩之外，人事部還要預備一套人手替換步驟，譬如滙豐證券就要dealingroom啲dealer輪流放假，唔要佢哋全部一齊返工，以備萬一有人中招，與因為同事被逼放假，冇返工嘅同事就可以頂上接棒。呢個方法幾好，保留後補兵源非常重要，斷唔可以俾「沙士」一棍打殘嘅。
不過大公司就可以咁做，中小企人丁單薄，隨時陷於苦戰，想做應變計劃都冇可能。食完飯入𨋢，一位老闆相貌嘅人問：「有乜好投資？」正喺佢隔籬嘅朋友答：「今年只求平安健康算咯，投資唔敢諗！」此乃今時今日嘅主流心聲，今年係咁先。