日本本田車廠於日前公布咗今年2月份嘅製造及銷售汽車數據，雖然本土生產線產量有所下調，但海外生產線嘅產量卻錄得強勁升幅，較去年同期有更出色表現。當中位於日本本土嘅生產線，喺2002年2月合共生產咗103,209部新車，較2002年同期下跌13%，但海外生產線卻錄得高達29.1%嘅升幅（達147,553部），而全球生產線產量平均上升7.7%（達250,762部）；若分區計算，位於亞洲區嘅生產線表現至為強勁，合共生產出19,843部新車，較2002年2月勁升105.6%，而北美及歐洲地區亦分別錄得20%及31.7%嘅升幅（達106,651部及17,095部）。
銷售數字方面，本土汽車銷量只有62,591部，較2002年同期下跌21.4%，但Fit（即港版Jazz）仍屬本田最暢銷型號，上月共售出19,055部，而僅次於Fit嘅會係Life（11,374部）及Accord（3,075部）；出口車輛數目亦錄得平均11.2%嘅升幅（達39,850部），當中出口往歐洲及亞洲地區嘅汽車數量，均分別錄得122%及8.3%升幅（達12,239部及2,066部），但北美及其他地區則有下調趨勢，原因可能與該等地區嘅生產線產量提升有關。