【本報訊】陳潔靈既是張國榮的死黨，亦是張國榮十多年的麻雀腳，在張國榮跳樓輕生前一日，陳潔靈便在張國榮家中陪他打麻雀陪足七小時，對於近日有報道指張國榮遭人落降頭，陳潔靈直斥報道荒謬：「梗係冇咁嘅事啦，太過荒謬，Leslie係精神受唔到壓力，身體產生咗啲變化，但我唔係話Leslie黐線，佢係正常人，正常人總會受到壓力，有時去到一個階段，唔係話睇醫生就即刻可以醫番好。」
盛傳張國榮與好友唐鶴德感情有變，但陳潔靈以非常肯定的語氣說：「絕對冇咁嘅事，當係我代唐生講都得，我識咗佢哋咁多年，佢哋感情從來冇出現過問題。呢樣嘢我可以好肯定。」
陳潔靈對好友跳樓身亡固然感到愕然，她個人相信張國榮是抵受不住精神壓力所引致。
事實上，為幫好朋友減壓，陳潔靈一有空便跟張國榮打麻雀，陳潔靈說：「我知Leslie睇過好多醫生，有正常嘅藥物治療，但打麻雀亦可以紓緩壓力，所以我哋一有時間就陪佢打麻雀。」
陳潔靈大讚Leslie牌品好，是一隻十分好玩的麻雀腳，不然，她也不會跟對方打雀麻打足二十年。
一般人以為，張國榮打台灣牌上落很大，但陳潔靈卻指他們只是打五十、十（即五十元一底，十元一番），上落不過數千元而已。陳潔靈又說：「佢近排打麻雀好旺，連贏幾場，而且重係一家贏三家，好似對上一次同佢打，佢一個人贏咗我哋五千蚊。」