非典型肺炎令港股噚日出現非典型走勢，在美股大升逾200點情況下，港股竟然唔識升，重要下跌58點，收報8648，不過幸好成交萎縮至不足66億元，反映沽壓唔算太大。不過，美林噚日調低港股投資比重，唔知後市沽壓會否大增？
香港經濟肯定會受到肺炎潮所打擊，港府減財赤計劃中有1/3收入是預計來自經濟增長，若肺炎潮惡化，香港經濟難有理想增長，而且醫療開支更可能大增，阿松肯定要重新計過數，03/04年度赤字應該唔止700億元咁少。
雖則話肺炎潮打擊消費市場，不過凡事有得有失，由於市民唔出街，睇電視與上網就成為最主要消遣。有線寬頻（1097）噚日借勢急升8.3%，收報1.95元，成交達783萬元，連帶電視廣播（511）亦企硬，升1.07%．收報23.60元。
黑客話，有線股價急升除咗受惠肺炎潮外，亦與其新知台獲批內地有限度落地權有關，這令有線引入策略性股東的議價能力大增。阿虎聽聞電視廣播亦會獲批落地權，唔知股價會唔會好似有線咁大升呢？
南華證券（619）噚日突然急升40%，收報3.5仙，雖然成交只得7750元，反映唔到乜嘢，但e莉莎話，證券行業難撈，唔少東主想賣盤，所以唔排除南華證券會有動作跟尾。
萬友消防（8201）前日大跌26%後，噚日反彈13.36%，收0.28元。此股之前大跌，主要有人擔心策略性投資者在禁售期解凍後會出貨。不過，據聞有人向證券界拍心口，3名主要策略性投資者都唔會沽貨，不過有關承諾是否信得過，就要自己諗。
阿虎