臨床身心行為學家李寶能昨日接受本報電話訪問時，認為曾奪金像影帝榮譽的張國榮是身心出現問題，他說：「做演員長時間要經歷同投入角色，所以喺現實生活中冇乜自我。張國榮係一個內向、被動、聽話同執着嘅人，演藝人同藝術家唔同，做娛樂界要睇巿場，所以一定要聽話，佢哋係商業製品，多多少少要做人哋要佢做嘅嘢，某程度上喺生活中已經做緊角色，真我好模糊。」
李寶能續說：「加上張國榮自細覺得屋企人唔理佢，形成佢孤癖同寂寞嘅性格，亦覺得呢個世界負咗佢，所以有抑鬱傾向。佢唔係精神病，亦唔係抑鬱症，應該去睇心理行為科。
「過於投入角色而未能抽離，會令到自我防禦系統出現問題，呢個系統本來係保護自己嘅，自己做錯都話自己啱。但出現問題後，呢個系統都當咗角色係自己，形成神經系統失調，一般人以為神經系統只係負責呼吸、脈搏，但其實神經系統同時亦負責心理同精神方面，有時所謂嘅走火入魔，都係因為神經系統失調，呢啲唔係病，冇藥食，要做治療、輔導同催眠去醫治。」