大市欲彈乏力，美股周三升逾200點，為港股帶來嘅刺激，亦只係曇花一現，恒指低收8648，跌58點，成交近66億元，愈來愈多散戶離開市場。期指收8587，跌63點，低水61點。
非典型肺炎失控，衝擊香港經濟，影響深遠，評級機構同大行紛將本港經濟增長預測調低，港人信心更大受打擊，跌到回歸後最低水平，股市焉有力反彈？家吓全民皆淡（起碼9成以上），但會否咁順攤，就咁大插插呢？筆者在現水平就有少少保留。
噚日做咗過小小嘅調查，問芬佬港股嘅前程，佢哋異口同聲睇淡（佔100%），但有逾半數人（佔60%）認為，暫時跌幅唔會太大，坦白講，大市上落，有無形之手操控，若然芬佬唔落井下石，短期大市嘅跌幅真係會好有限，甚至唔排除佢哋先挾一轉淡倉，然後再質過。
當然，家吓絕對係消息市，若然非典型肺炎蔓延情況惡化，又或美軍打入巴格達引發生化戰，死得人多，咁個市就會大散。總之，以中線策略嚟睇，有機會反彈後先沽落去，贏面較大。
國企鋼鐵股已派晒成績表，成個行業由谷底回升，3家公司嘅業績都好理想。馬鋼（323）啱啱宣布，02年度（12月年結）營業額109.7億元人民幣（下同），升15%，盈利3.08億元，升100%，每股盈利4.77分，末期息3.5分，PE14.8倍，息率4.9厘。
馬鋼亦提高固定資產折舊率，由原來5.6%提高至6.5%，估計今年須增加的折舊費用達1.3億元。鞍鋼（347）早前亦已宣布提升固定資產折舊率，估計今年開支會增加逾1億元。
鞍鋼02年度營業額107億元，升13.5%，盈利5.98億元，升63%，會計政策轉變，對鞍鋼盈利表現影響較大。鞍鋼每股盈利20分，派息10分，PE6.8倍，息率7.2厘。
重鋼（1053）02年度盈利2.86億元，升38%，每股盈利26.9分，派息8分，往績PE4.4倍，息率6.6厘。
3隻鋼鐵股比較，以鞍鋼和重鋼較優，後者PE較低，可秤先多少。
大市跌定後，可上車，好大機會財息兼收。
郭兆誠