張國榮的初戀情人毛舜筠獲悉對方的死訊後，十分傷心。毛毛昨日在電台主持節目，只做了約十分鐘的直播節目便提早離開。毛毛對着空氣緬懷亡友，惋惜張國榮為何在解不開心結的時候不找她傾訴，而選擇了一條不歸路。
張國榮前晚突然跳樓身亡，其初戀情人、在八○年和他拍過拖的毛舜筠，接獲噩耗後非常傷心，但毛毛昨日仍與拍檔、商台創作總監鄭丹瑞繼續為商台主持逢周一至周五上午十時至十一時半直播的節目《爸爸早晨！媽媽早晨！》。不過她只主持了約十分鐘的節目便離開。
毛毛昨日以一身素服現身，容顏十分憔悴，雖然戴上太陽鏡，仍難掩傷感。
鄭丹瑞率先在節目中講述張國榮的死訊，毛毛已開始飲泣，鄭丹瑞安慰毛毛說：「其實做唔到唔使繼續做落去。」毛毛即說：「我想講少少嘢，哥哥（張國榮）走咗，我好難過，好傷心，我失去咗一個細細個認識，同愛錫我嘅好朋友，更難過嘅係，我唔開心，佢陪我傾偈，佢講嘅嘢重喺我耳邊。我相信佢心情好差，情緒好低落，好絕望，但佢冇畀機會我陪佢幫佢，一齊走過呢段除咗死唔可以解決嘅路，我好難過。」毛毛說到這裏不禁哭個不停。
其後毛毛續道：「但呢件事令我有好大感觸，香港𠵱家咁亂，經濟好差，又有肺炎，大家好緊張，好大壓力，呢個時勢，大家更需要愛，大家要手拖手，共度難關，我哋需要正義聲音伸訴，同時更需要愛嘅聲音去接受同關懷。」毛毛說完一番肺腑之言便離開，拒絕接受記者訪問。
鄭丹瑞為免毛毛太傷心駕車有危險，所以安排了兩名工作人員扶着毛毛到停車場，並由專人送她回家休息。
鄭丹瑞體諒毛毛現在的心情，他說：「毛毛都好專業，我唔擔心佢，毛毛有家人支持，大家唔介意我講一句，愛你身邊嘅人，多啲傾偈。我都有同哥哥（張國榮）喺電影《緣份》合作過。」
採訪、攝影：汪正文
