經紀陳今次確叻，科達集團（673）咁冷門都畀佢貼中，不過科達噚日雖然升咗8.33%，收1.04元，但係成交金額只得72.8萬元，明顯唔夠鑊氣。
經紀陳則唔係咁睇，叫小初放長雙眼慢慢睇，便知龍與鳳。不過，小初始終怕上車容易落車難，只係睇戲算數。
另外，經紀黃又有新推介，就係雅視光學（1120），佢話外國名嘴申報，持有超過5%雅視一事，令佢有好大啟發，覺得隻股有得諗。雅視以全日高位2.05元收市，升4%，隻股將於下周三公布全年業績。
經紀黃話，雅視大部份街貨向來由幾個芬佬坐住，計埋外國名嘴持有超過5%，街貨其實相當乾。雖然佢唔肯定雅視全年業績有幾正，但按往績表現，估計派息政策唔會有大變，以免留唔住芬佬。雅視計落可以跟風炒一轉，況且家陣咁亂嘅時世，玩工業股始終安心啲。
慕容小初