一味窩輪:中移動Call輪揀兩件炒

一味窩輪:中移動Call輪揀兩件炒

港股連跌8日後,終於出現技術性反彈,恒指回升109點。大藍籌中比較醒神嘅有中移動(941),有45仙進帳,搵理由解釋,除咗因超賣而反彈,重有生意唔受中東戰火影響,反而因為少啲人外遊,可能要打多啲電話。
若認為中移動重有多少上升空間,搵Call輪短炒,有兩隻正路對象可以諗吓,就係9770同9754。
9770今年9月夠鐘,現價21.2仙,溢價9%,槓桿率7.4倍。9754亦係9月夠鐘,現價14.1仙,溢價14.1%,槓桿率11.1倍。
大市𠵱家壞消息多過好消息,做好友揸Call輪,咪過度衝動。如果美英聯軍向巴格達推進有成績,又或者伊拉克個鬍鬚仔繼續成日搵代言人喺電視螢幕上露面,又或者本港肺炎每日呈報人數大幅下降,則大市會有真正小陽春局面,否則過1日驚1日,個市升完又會冇氣,難有大氣候。

大市再升可揸Put輪
大市若再升多一兩百點,中東局勢同肺炎問題又冇乜大轉機,則不妨細注吼吓做淡嗰邊,揸啲恒指Put輪,對象係9587同9619。
和黃(013)再升60仙,收43.70元,但熱門Call輪9666唔跟正股,不升反彈,收12.6仙,回落4.5%,唔係好現象。
章盛