近排令人心傷嘅新聞一單接一單，中東打到死傷枕藉，香港就要對抗非典型肺炎；應該帶領港人度過難關嘅特區政府，又因為阿松偷步買車事件威信受損、陣腳大亂；連哥哥張國榮都喺愚人節同大家開咗個最殘酷嘅玩笑。
不過噚日立法會記者室有番幾分喜悅氣息，因為全力響應煲呔曾人口政策而再次添丁嘅立法會議員陳智思，個仔都未滿月，已經急不及待帶來豬腳薑、紅雞蛋同酸薑請記者食。其實陳智思出身泰國華僑家庭，又喺外國受教育，中文認真嘛嘛，比起阿松，佢先係貨真價實嘅番書仔，睇唔出佢連傳統禮節都做到足，果真是家教好。
八方聽聞，陳智思買呢啲薑醋認真就手，皆因佢老竇係中華總商會會長陳有慶，陳智思就係向中總嘅中菜部訂購，肥水不流別人田。在場記者唔理肺炎菌肆虐爭住試味，豬腳好快已經一掃而空，剩低嘅老薑亦不乏捧場客，有幾好味可想而知。其實家陣時勢立立亂，好多人都唔敢「造人」，陳智思有咁嘅勇氣逆市生仔，值得鼓勵。
傳真︰2623-9278
電郵︰