張國榮前日在中環墮樓身亡，結束其四十六年的短暫生命，有指張國榮的面相因鼻和嘴唇之間的人中位置太短，所以壽命不長。未知可是這個原因，加上張國榮近年備受情緒問題困擾，解不開心中的鬱結，於是就毅然選擇了自殺之路。
記者昨日致電堪輿學家麥玲玲，問她覺得張國榮的面相如何？麥玲玲說：「張國榮四十六歲行緊鼻運，但佢個鼻兩邊鼻翼唔太靚，而且雙耳雖貼，但冇耳珠，通常耳珠可以有逢凶化吉嘅作用。而且張國榮面部主壽命嘅人中位置比較短，都有一定影響。」
綜合來看，麥玲玲讚張國榮的面相平均，她說：「佢生得咁靚，都算男生女相，呢類面相係一生有好多波折。張國榮一雙眉是一字眉，佢會有好大野心，但為人聰明。不過佢嘅眼尾有下垂同憂鬱眼神，呢類命相嘅人好易被感情困擾，佢對感情好專一，但就會將心事收藏，唔易同人分享，亦唔善於表達自己嘅內心世界。」
麥玲玲續說：「其實面相每個部位都要互相配合，如果佢有呢個關口過唔到，都算係一大劫。如果佢可以避得到呢個劫，面相可以行到下顎，大約有六十歲命，所以張國榮嘅死，真係好可惜。」