非典型肺炎病毒短期內都冇辦法消滅，戴口罩變成市民生活嘅一部份。富城集團訂咗四萬個口罩，四月一號開始，喺管理嘅物業派發，每人一個。
富城𠵱家管理嘅業戶超過十五萬戶，約六十萬人，四萬個咪唔夠派？富城方面表示，假如各屋苑或業戶重有需要，可以代訂。佢哋講，其實唔係個個業戶都攞口罩嘅，好似荔枝角美孚新邨，有成萬戶，雖然今次只係分到八千個口罩，但𠵱家重有剩。
富城透露，佢哋訂嘅口罩，係醫生做手術用嗰隻型號，只係個幾銀錢一個。如果業戶想要，不妨要求佢哋代訂。
另外，富城董事總經理鄭錦華話，佢哋成立咗個「富城集團危機傳訊中心」，統籌發放有關病毒蔓延嘅資訊，兼提供各項防預措施指引。
上海著名豪宅世茂濱江花園，舊年推出三號樓發售，賣出住宅總值十六億五千萬人民幣，成為舊年上海市住宅銷售第一名。
原來，個盤喺前年賣二號樓，亦攞到當年嘅上海住宅銷售冠軍，認真巴閉。世茂濱江花園一號樓𠵱家喺香港內購，每方呎約千五蚊。
世茂集團喺上海嘅另一個樓盤世茂湖濱花園，舊年銷售總值有七億五千萬人民幣，排第七位。
香港俾非典型肺炎搞到一頭煙，個個冇心機買樓，但係深圳就好似唔受影響，祈福新邨喺三月就賣咗五百個單位，套現二億一千萬，喺傳統淡季中有咁嘅成績，認真不俗。
對於樓盤咁好賣，發展商嘅講法係不斷有新品推出；區內配套完善同埋有口碑。原來個盤有七成銷量都係靠舊業主轉介。
發展商講，有唔少參觀人士係嚟自廣州，人數雖然冇旺季咁多，但免費專車車站都好墟冚。
近排個市可以用內憂外患嚟形容，美伊戰火持續，非典型肺炎又愈搞愈大，波折重重。好多行業同機構，都叫員工做好預防肺炎措施，地產代理公司為咗員工安全及身體健康着想，取消不必要的集會。
繼美聯物業後，利嘉閣決定取消今個月嘅營業員大會。個會原定今個月十五號舉行，成個集團七百幾個代理都會出席。近排唔少大型集體活動都因為「避炎」而免得就免，索性取消。
肺炎擴散，令樓市突然變得好靜，業內人士講，啲客都唔係好想出嚟睇樓，成交量一定急跌，但舖位物業就似乎冇想像中咁差。
投資者仍肯入市買舖，而且要求重降低咗，只要有五到六厘都肯要，但要求係一線區嘅旺舖，而且物色嘅舖位面積一般係一千到二千呎。
以前一線舖投資者，冇七到八厘都唔吼。不過，二三線舖位就堅持要有七到八厘回報至買。
蘭西
電郵地址：
