衞生署重申香港不會成為疫埠，專家睇勻國際法例，竟然冇一條可以要求香港因非典型肺炎而宣布成為疫埠。不過，世界衞生組織已經呼籲遊客及商人不要來港，而各國又採取措施，防止曾到港人士帶病毒入境，瑞士直接禁止港商參與當地鐘表展，香港本身是否宣布成為疫埠意義已不大，因為人家已變相宣布香港成為疫埠，阿虎最擔心嘅事開始出現。
現時香港嘅經濟前景或財赤已非市場焦點，皆因人命才是最重要，但阿虎真係唔明白，點解要將懷疑染肺炎之淘大居民遷往鄰近萬宜水庫的麥理浩夫人度假村，港府作此決定時，究竟有冇半點危機意識？
王氏國際（099）每股賺7仙，但就每股派息9毫，刺激股價勁升19%，收報1.51元。Cookie話，王氏國際將星洲電路板業務私有化後，有感資金缺乏出路，所以派大息予股東。派完息之後大股東手持現金增加，可能會趁現時市況奇差，提出私有化建議，有貨者大可收完股息等收購，毋須急於沽貨。
港股噚日繼續出現補倉活動，恒指收報8706，升109點，成交達72.98億元。黑客話，大戶補倉應補得七七八八，加上噚日世衞叫人唔好來港，大摩與高盛雙雙調低香港經濟增長預測，相信芬佬最終亦會調低香港投資評級，直至見到肺炎受控制為止，因此已有淡友開始趁反彈出擊，據聞目標要見98年金融風暴時的低位。阿虎翻查紀錄，98年港股低位是6545，淡友有冇咁厲害呀？
奧瑪仕（959）停牌，有消息話母公司裕豐國際（965）被申請清盤，奧瑪仕亦受到牽連。
阿虎