一代巨星張國榮前日傍晚在中環文華酒店跳樓身亡，終年四十六，有指他是為情所困才選擇輕生。一直予人為張國榮背後的男人，與他一起十八年的唐鶴德，近日面對二人感情亮紅燈的傳言都保持緘默，他昨日凌晨終忍不住開腔，三度強調與張國榮感情從來未變，並透露張國榮因患有抑鬱症，加上當導演心願受阻，去年十一月曾經自殺不遂。 記者：蔡如玉
唐鶴德昨日凌晨三時四十五分，在司機陪同下站在大門，隔着鐵閘接受訪問逾半小時。身穿白色浴袍，頭髮蓬鬆的唐鶴德，帶着紅腫雙眼，淚痕未乾，嘴唇上方仍帶少許鼻水，他說話時表現平靜淡定，不過每提及與張國榮的感情危機傳聞時，還是表現得稍微激動。
對於外界指張國榮是為情自殺，唐鶴德看來相當介懷，他三度強調與張國榮多年感情從未變過，亦絕無第三者介入，還指摘傳媒編造故事，唐鶴德說：「我哋十幾年感情一直都好好，亦冇第三者出現過，我對佢冇變過，我知佢depressed（沮喪、抑鬱），我花咗好多時間陪佢，開解佢。」那麼張國榮是為何輕生？唐鶴德說：「事業有阻滯啦，好多嘢嘅，好複雜，我知點解，但我唔會講，睇佢家人要唔要講先啦，我哋之後會畀歌迷大眾一個交代。」
被問到至今一刻還是否很愛張國榮？唐鶴德有點不滿地反問：「呢一刻？點解只係呢一刻？」是否這麼多年都仍很愛他？唐即說：「係呀，咁多年嚟傳媒講嘢好唔負責任，又話佢同個assistant（指與唐及張鬧三角戀的助手Kenneth）。」
唐鶴德最後見張國榮是何時？他回憶着說：「晏晝十二點左右，佢話想出去揸吓車，佢睇起嚟好似平時咁冇乜嘢，後來佢要去做運動，我叫司機打去問佢要唔要帶衫畀佢，佢話唔使，我之後約咗佢打波，嗰時五點幾通電話，我哋約咗七點喺打波地方等。」
問他怎樣接到哥哥死訊？唐鶴德突然咧齒笑說：「你覺得我要唔要喺度講？」記者表示由他自己決定，唐定一定神再說：「哥哥十一、十二點出咗街，我哋一路有通電話，我問佢點點點，又叫司機打兩次畀佢，最後一次打畀佢，我問：『你使唔使我幫你攞返啲嘢？』我哋約咗七點鐘打波，咁佢就話：『你幫我執嘢，我哋球場見啦，我自己揸車落去，你揸車去球場見。』後來陳太（張國榮前經理人陳淑芬）打畀我，陳太話問佢去咗邊，要去問候佢，佢話喺中環，結果約喺中環飲茶啦，陳太發覺佢有啲唔妥，啱啱我去緊打波嘅時候未到，陳太打畀我，我咪即刻去醫院囉。」最後見張國榮的是否陳淑芬？唐謂：「唔係，陳太唔係最後一個見佢。」得悉張國榮過身時，唐有何反應？他說：「好驚。」有否懷疑是愚人節被整蠱？唐鶴德說：「冇諗到呢一方面，我去到醫院都重好驚。」傳聞之前有人打過電話畀張國榮相約見面，唐鶴德說：「據我所知就冇。」
見過張國榮的遺體情況如何？唐鶴德無奈地說：「我見佢好少，想見佢多啲都唔得，醫院方面話唔好喎，你哋唔好亂寫喎。」
張國榮有否心願未了？唐鶴德聽罷問題後，雙手捉緊鐵欄笑着反問：「你哋唔知咩？你哋冇做功課就嚟？你哋唔知？」記者問他是否做導演？唐鶴德回復淡定地說：「佢係好想做導演，都未做到，佢有咁嘅才華，我好支持佢㗎。舊年三月佢想開戲，點知有阻滯，佢身體又唔好，個心有事，個胃有事，搞到個人好唔開心，佢個人又好緊張，好着緊做嘢。」
問到張國榮以往有否曾經自殺過？他毫不猶豫的說：「舊年十一月試過唔成功。」當時張國榮是如何尋死？唐表示不欲透露，但據悉張國榮去年十一月曾服食安眠藥尋死，但被及時搶救。
唐鶴德有否看過張國榮的遺書？他說：「我冇睇過，有人話畀我知大概內容，但我冇必要講出嚟。」張的遺書中有言「我一生冇做壞事，為何這樣？」唐鶴德知否張國榮的「為何這樣」所指為何？他說：「我知乜事，但唔方便透露。」
張國榮是否有患抑鬱症？唐鶴德想一想才說：「從我角度睇呢，哥哥係可能有啲抑鬱症，其實呢樣嘢唔係我判斷，係醫生判斷。」醫生有否判斷張國榮是患上抑鬱症？唐謂：「我唔知係咪應該用我呢個位置答你，我對呢樣嘢認識有限，我覺得佢係。我唔敢好專業咁話畀你聽，我覺得佢係。」張國榮是否需要以藥物穩定情緒？唐說：「呢樣嘢唔好講，等我問咗佢家人需唔需要講呢啲先啦。」張國榮是自願接受精神治療？唐鶴德表示：「願意。」
有傳張國榮拍罷電影《異度空間》後無法抽離？唐鶴德說：「佢好專業，拍完戲佢自己識處理，唔會有咁嘅情況。」有傳張國榮因撞邪致精神出現問題，唐鶴德否認說：「呢樣嘢唔係嘅，唔係撞邪，而係跟住落嚟可能……我唔知係咪應該同你哋講，佢有啲事可能有啲唔順利，產生咗啲嘢。」
張國榮是事業還是家庭出問題？唐說：「屋企冇問題。我想希望你哋可以重申畀讀者知，我同哥哥感情冇變過，唔好以為佢曾經同嗰個assistant（助手），重作到佢係北京有錢仔，話有一段情，好無聊。」那麼張國榮與他之間有沒有第三者出現過？唐鶴德邊說邊指着身旁男子：「完全冇。連我呢個做咗十幾年嘅司機，求其影兩張相就話佢係我男朋友，車我去玩。」
唐鶴德未來會為哥哥做些甚麼？他說：「幫佢做乜？我幫佢做咗好多嘢喇。後事有人幫佢做，我出嚟做後事會好多人跟住晒，一定做唔到嘢。除非你哋保證唔會跟住我，我唔會出嚟做呢啲嘢，已經安排咗邊啲人做邊啲嘢㗎。」會不會成立治喪委員會？唐鶴德謂：「𠵱家未決定，Leslie本身有好多兄弟姊妹，好多外甥，唔需要咁。」張國榮的兄弟姊妹全知悉死訊？唐鶴德說：「全部通知晒呀。」唐鶴德有否打算讓張國榮火葬還是土葬？他說：「佢講過想火葬。」喪禮怎樣安排？唐鶴德說：「未知。」
