學校停課，有好多家長贊成，但亦有一啲家長擔心子女功課與公開考試。四月本來係中五中七學生好緊張嘅月份，其他班級亦有中期測驗試，啱啱喺呢個時候停課，時間性確係唔盞，唔怪得喺《城市論壇》上，沙田區家長教師聯會會長余榮輝講到：「政府宣佈停課前，我哋開過會討論應否停課，家長嘅意見，兩邊都有。」
香港家長，極度重視仔女上課，中三以上嘅學生家長尤其如此，面對「沙士」，心情十分矛盾。不過自從淘大花園成為重災區之後，香港人已不堪再嚇，學校停課再延長一啲，都唔會有家長表示異議。
為停課一事，教統局局長李國章成為考AO（政務官）畢業生嘅典範，三月二十五日星期二，佢宣佈唔使停課，理由多多，但留下一條尾巴（政府會日日檢討），到咗星期四（三月二十七日），政府宣佈停課，李局長又可以講出好多理由證明點解要停課，三月二十八日到立法會說明落雨擔遮唔算轉軚，認真精彩；唔怪得佢在中大服務之時，中大學生辯論隊一向戰績彪炳，屢獲冠軍。唔少辯論隊成員考AO之時，成功率甚高，皆因慣咗辯論，執到正方就話正方啱，執到反方就講反方對，絕無固定立場，李局長聽晒董特首命令，一時講一樣，兩日之內改變口風，充份證明佢係一個teamplayer，認真遵守「集體負責制」。跟住董特首呢啲唔聽意見隨時改變主意嘅老闆，你估咁易做乎！