求驗客手記：拉素有大水喉恐跌watt

有意注資拉素嗰位巴林石油大王，前日響拉素練習場出現，重同球會高層共晉午餐，睇嚟成事機會好大。唔止咁，拉素響同日落實向球員發放舊年十月同埋十一月嘅欠薪；但係我求大俠至怕班波有錢聚腳喪失鬥志喎。
點解咁講？記得季初拉素氣勢如虹，成班球員為咗有糧出搏晒命，到後嚟攞到部份欠薪後就即刻連續兩三場踢得「𣲷油」；好彩拉素呢個禮拜日主場只係對科木，照計跌watt都夠贏。另外，索到暈嘅意大利小姐森柏露色勵拉素球員，話如果拉素攞到聯賽冠軍就當眾除衫慶祝。但拉素差榜首祖記十二分，好難追啫，靚女你博宣傳都搵個好啲方法啦。

舒密加去山度士跟操
係人都知一級方程式世界冠軍舒密加好鍾意踢足球，但唔知佢點解咁勇，響巴西賽站日進行前四日，重走去當地老牌球會山度士跟操，重講到鬼死咁興奮。呢位上屆冠軍今年頭兩站都三甲不入，唔知佢係咪積極借足球減壓，定係心灰意冷，借足球逃避呢？佢班車迷當然希望係前者啦。

1860中文網好粗疏
德國慕尼黑1860近日推出咗中文網（www.tsv1860.cn ），唔多唔少係想借邵佳一個名打入中國市場；不過邵佳一至今響德甲發展認真麻麻，怕且好難捲起旋風。再講，我求大俠特登入去個網睇，發覺內容好粗疏，而且有關邵佳一嘅介紹真係唔多，好心班德國佬有心搞就徹底啲啦。

李安納度掛靴坐office
巴西球星李安納度前日宣布掛靴，實牙實齒話呢次唔會學上次咁唔嫁又嫁。𠵱家佢出任AC米蘭副會長加里安尼助理，專心幫球會搞慈善基金嘅行政工作。查實隊波有機會爭三冠，佢放棄以球員身份去爭錦標，真係大犧牲；不過一諗到佢將來會升做副會長，俾你揀都寧願歎世界，坐office好過成日練波咁辛苦啦。

NBA季後賽前旺上盤
噚日NBA八場波全部大熱贏晒，除咗爵士作客快艇讓六分場波外（只差一分），其餘七場全開上盤，證明啲強隊正為季後賽衝刺，務求以最高排名爭入季後賽；相反啲冇機會入季後賽嘅魚腩已打定輸數，寧願輸多幾場爭取更高嘅新人遴選權。所以呢排見到啲冇機會入季後賽，或者強弱懸殊嘅波，捧上盤着數。
逢周一至周五見報