張國榮前日墮樓身亡，一代巨星殞落，張國榮生前的好友都傷心不已，加上他在圈中人緣頗佳，因此大家對張國榮的死訊均感到意外和惋惜。
張栢芝：
哥哥（張國榮）之前話過寫套戲畀我拍，畀我做最佳女主角，點知套戲都未寫完佢就咁樣。我嗰陣整親瞓喺醫院，瞓喺床只係望到天花板，佢送個護身符畀我，話呢個護身符係哥哥戴住，好好㗎，叫我戴喺身邊，我一直放喺身邊。
容祖兒：
幾年前大家合作拍過電台宣傳片，我覺得佢係一個好專業嘅巨星，聽到佢嘅死訊重以為講笑，啲同事重話唔好亂講，張國榮聽到會鬧人。事後證實死訊，我只希望佢可以安息。
杜琪峰：
我將會同佢合作一套電影，但佢就咁走咗，大家以後都唔可以合作，佢嘅死亦係電影界嘅遺憾。
譚詠麟：
證實張國榮死訊，我都冇晒心機，我知每個人都有唔同崗位，但係嗰剎那好心酸，好心噏。尤其佢咁貪靚，點會踏出呢一步？藝人好易鑽牛角尖，張國榮呢次跳樓係錯誤同儍嘅决定。
沈殿霞：
如果呢種係佢解脫方法，我都會好尊重，但身為佢身邊朋友，我會好唔捨得同心痛。
羅家英：
佢都算英年早逝，人總有死穴，可能咁啱篤中，我覺得佢應該係枉死。我同佢合作過電影《金枝玉葉》同《色情男女》，佢為人好有責任感。
關心妍：
我阿姨係張國榮嘅超級fans，知道後喊到收唔到聲，重起唔到身，做藝人好大壓力，將自己睇得細啲壓力自然冇咁大。
狄龍：
我同Leslie合作過三部戲，我有兩部都攞獎，佢真係好利我。我同佢有三個約會，一次我去佢屋企食飯，佢話好想做導演，搵我拍，後來拍唔成，後來一次施南生媽咪生日，我見到佢情緒好低落。呢排林青霞一直陪住佢，陪佢睇醫生，林青霞同我講話佢真係有問題，我哋都幫得佢唔夠。
