福山雅治一向公認係演而優則唱嘅藝人，最近佢推出咗一個寫真集加DVD嘅巨型boxset《嗚呼、大感謝祭！！》，內容又真係幾盞鬼，由於只係限量推出十萬盒，唔怪得好多fans都同我羅拉講，話盒boxset未出已經一早吼到實！
福山呢套boxset嘅包裝，似一本豪華寫真集多過一盒DVD，寫真集輯錄咗福山上年十一月喺大阪舉行演唱會嘅情景，全部玩黑白feel，充滿紀錄片嘅感覺。
不過fans唔使擔心，DVD梗係唔會玩黑白啦，fans除咗可以睇到福山喺台上自彈自唱之外，重可以見到佢過去五年搞賀年演唱會嘅精華片段同狂冧女fans嘅招數，好似對住鏡頭狂咀、台上畫公仔、掟曲譜落台，甚至走落觀眾席畀fans拉到露晒膊！
最有趣係DVD入面介紹咗福山過去五年喺賀年個唱嘅「花臣」嘢，例如推出特製栗子、果醬同沙律醬喺會場發售，又喺場外起咗個「福山大明神」廟，啲瘋狂fans真係好誠心咁參拜，又喺門前拍照留念，相當搞鬼。