人心惶惶，市場流言四起，一時傳特首會辭職，一時又話香港會宣布成為疫埠。噚日係愚人節，特首辭職傳言係惡作劇，但係疫埠就傳到似層層，特別係食晏時間，在中環一傳十，十傳百，下晝開市恒指應聲急挫成百點，好在十零分鐘後，政府發表聲明，澄清並無其事，大市先由低位反彈。
大市連跌8日，恒指收8596，跌37點（最低8465，大跌168點），成交近85億元。大市連續下跌800點，跌幅已大，噚日午後已見有淡倉開始回補，期指轉強，低水縮窄到37點。
大藍籌反彈之勢都幾急，好似長實（001）、新地（016）、和黃（013）等，由低位回升逾1元，恒地（012）同太古A（019）更逆流而上。滙豐（005）新股出籠，沽壓未算重，平收80.25元。國企股個別發展，兩隻剛宣布業績嘅重型石油股，中石化（386）同中石油（857）都有1仙進帳。
中石化同中石油盈利都有增長，業績比預期為佳，家下油價高企，如無意外，兩公司今年盈利應可再進一步，加上派息唔錯，係收高息嘅穩健對象。
中石化02年派息8分人民幣，息率4.7厘，派息比率42%；中石油派息12分人民幣，息率6.8厘，派息比率45%。兩者比較，又以中石油更吸引。
中石油盈利增長的主要原因，係煉油毛利和天然氣銷量上升，其中煉油業務扭虧為盈，獲利28億元人民幣，天然氣與管道業務盈利15億元人民幣，比前倍增。去年原油平均實現銷售價格22.48美元一桶，下跌1.13美元，今年首季平均售價約為29美元，估計全年平均售價會比去年高出頗多。
近期有一隻新股上市，就係從事地基工程相關業務嘅三和集團（2322），特點係PE只得2.8倍。今次上市，發售7500萬股，售價0.67元，集資約3500萬元，用作發展業務和收購之用。
三和除PE低外，預期息率亦幾吸引。03年度（3月年結）集團聲明不派息，但估計04年度派息比率30%至40%，中期息佔全年派息一半。以03年度盈利5600萬元及派息30%計，04年度保守派息5.6仙，息率達8.3厘，頗為吸引。
郭兆誠