黃秋生上年拍完部《無間道》，人氣即刻急升，大把公司爭住搵佢拍戲，最近向華強同老婆陳嵐嗰間中國星搵秋生拍戲都發生咗啲風波，原來王晶幫中國星開咗部《黑白森林》，部戲搵咗秋生、陳小春同杜汶澤做，聽講部戲都好似《無》片嗰類型。
而《黑白森林》原本想喺暑假上映，但聽聞寰亞知道後有啲唔開心，因為《無》片前傳都會喺暑假做，又係以秋生為主，所以寰亞最初唔肯放秋生拍呢部戲，搞到兩間公司嘅老闆都唔多高興。
後來要由王晶出馬搞掂兩間公司，王晶同中國星老闆向華強兩公婆、寰亞老闆林建岳關係都好好，而呢部戲又係由王晶製作嘅，咁當然要由佢收科，為咗免傷和氣，中國星終於肯讓步，將部戲推遲到暑假之後先上映。
內地導演陳凱歌本來計劃同太太陳紅，喺後日抽兩日時間嚟香港宣傳佢部新戲《和你在一起》，不過因為非典型肺炎問題，佢哋已經決定取消今次香港宣傳行程。負責呢部戲香港發行嘅洲立影片，噚日公關部何小姐接受電話訪問，證實陳凱歌因為香港嘅非典型肺炎問題嚴重，加上其他原因，要將行程押後到月底。
張敏近期幫台灣雜誌《FHM》拍攝封面照片，佢個造型好性感。張敏除咗着一條黑色低胸短裙外，重着咗一對魚網絲襪，再擺出誘人甫士，都幾殺死人㗎。張敏以往都行過性感形象，呢次再攞天賦本錢出嚟，又點會唔掂呢！
港台同商台噚日都分別宣布有唔少活動要延期或者取消，而兩個台都搵咗好多歌手幫手做啲嘢鼓勵吓市民，好似港台就搵咗鄭秀文、張學友、謝霆鋒等講啲鼓勵嘅說話，而商台就搵咗容祖兒、陳小春、楊千嬅、梁漢文等唱番佢哋嘅歌，但就全部改晒歌詞，有啲重好搞笑，呢個禮拜五會不停喺電台播放。
噚日有讀者投訴，話非典型肺炎已經搞到人心惶惶，點知明珠台噚晚播嗰集電視劇《仁心仁術》（ER）竟然又係講醫院受到不知名病毒傳播，搞到全院封閉，咁做法咪更加令到港人情緒不安？不過，噚日無綫外事部回覆，話頭十五分鐘劇情其實係承接上一集嘅內容，講病毒受到控制，大家好積極咁面對困難，若然抽起呢部份唔播嘅話，故事就會冇晒連貫性。
楊受成細佬楊超成同有「玩具大王」之稱嘅蔡志明千金蔡加敏等噚日喺上環出席東華三院就職典禮。而楊超成同蔡加敏都無懼肺炎，冇戴口罩出席。問到成為新一任主席嘅楊超成會唔會搵多啲英皇藝人出席東華嘅活動時，佢話：「每年慈善機構都需要歌星支持，唔係一定搵英皇。」而二十幾歲嘅蔡加敏更成為東華歷屆最年輕嘅總理，佢話：「做總理，爸爸精神上會支持，而錢就自己出番。」
