過氣三級片王、上山詩鈉舅父曹查理，因為電影市道低迷，轉行在九龍城賣豬骨煲，但人算不如天算，碰上非典型肺炎肆虐，令生意大跌，曹查理惟有長時間站在舖頭外的代客泊車櫃位招攬生意，他表示生意情況只能用「慘、慘、慘」來形容。
本港電影市道低迷，與葉玉卿合作《卿本佳人》、《我為卿狂》和《情不自禁》等多套三級片的過氣鹹片王、上山詩鈉的舅父曹查理惟有轉行賣豬骨煲，但近日非典型肺炎肆虐，經營飲食業更加困難。前晚十一時左右，記者在九龍城南角道巨瀧海鮮骨㷛大王，見到曹查理站在食店門外的代客泊車櫃位，裝扮如酒樓部長般，又不時走上走落，親力親為招呼客人。
記者上前問曹查理是否轉了行？他說：「呢間舖我有啲股份。」然後遞上卡片給記者，原來除了這間食店外，他亦是泰屋泰國菜館的經理。曹查理說：「我企喺度係因為要望住啲生意，間舖十二月開，本來日日爆晒棚好犀利，但一踏入三月，非典型肺炎爆發之後就出事。今日成日都得七、八枱客，做得幾千蚊生意，燈油火蠟都唔夠畀，隔籬有啲舖頭直情拉閘唔做生意，總之就係慘慘慘啦！」
記者採訪時，舖頭內亦不是太多客人，曹查理說：「我都有同其他股東商量解決辦法，舖頭有二十幾個員工，已經多啲叫佢哋放冇薪假共度難關，但長期停薪留職都唔係辦法，希望呢段時間業主唔好收租，政府快啲搵到個病源，唔係香港就會變疫埠喇！」
曹查理現時已沒有拍電影，他說：「電影巿道咁差，我先至轉行，諗住自己有啲知名度，可以吸引多啲客嚟幫襯，間舖開到半夜三點，諗住有多啲夜鬼嚟食嘢，點知人算不如天算，燈油火蠟都蝕多啲。」
採訪：馮美茵
攝影：林德雄
