自「雙生兒」的成功，樂壇就颳起組合風。男子組這一邊，更因Boy'Z的正式出道，無可避免地與同為二人組合的Shine來個正面交鋒，鬧得熱烘烘：有指Shine的歌迷貪新忘舊，另投Boy'Z懷抱、也有說Shine人氣依然高企，同場現身歌迷多過Boy'Z一倍……路遙知馬力，誰勝誰負言之過早！但當下先來個小結算，睇吓邊隊在轉入直路前領先一個馬位？
記者：吳佩璇 攝影：林栢鈞、陳盛臣
Fans絕對是偶像保持人氣的最大資產，先找來忠實Fans自爆迷戀偶像的種種難忘事。
忠實擁躉Casper喜歡Shine的大男孩形象，及簡單而另類的歌曲。凡Shine有份演出的電影，他套套都跟去片場。「最犀利係《五個嚇鬼的少年》，我跟足佢哋兩星期，陪佢哋捱通頂！」他跟阿雯等其餘幾個核心成員，幾乎逢Show必到，多則一星期見足7日！即使Shine沒Show出，他們也懂門路設法「捕」偶像。還教路指天佑住九龍，金馬倫道及加連威老道是碰上他的熱門地。至於又南則可在皇室堡及世貿一帶碰運氣。所以，平均每星期都可跟偶像見3、4次，分分鐘比見父母還多！
至於才16歲的阿雯，更曾為一件小事而落淚。話說有日阿雯同Casper相會後分別去了黃埔及尖沙嘴逛街，然後再會合。誰知就在這分開的短短數小時內，Casper他們在尖沙嘴碰上天佑。而在黃埔逛街的阿雯因跟天佑緣慳一面，竟自責不往尖沙嘴去，更激動得落淚，「雖然成日有得見，但未試過喺街撞到嘛，所以好𤷪！」問她可怕愧對青春，阿雯精警的答了句「有得嘥時重唔去嘥」！果然是花得起時間的半成年！
5名Boy'Z的核心Fans，都不約而同在去年底、Boy'Z還未正式成立前，就主動致電唱片公司說要加入FanClub。其中Polly自言：「第一次咁癲！Kenny做Y2K嗰陣我已經好鍾意佢，靚仔固之然啦，有新鮮感又夠陽光。」舊年Kenny生日那天，就讀中七的Polly除要應付功課，翌日還有校內音樂表演，但仍夜麻麻趕在12點前出尖沙嘴親送禮物！
2月10日是Boy'Z正式命名的大日子，Osca比Boy'Z還緊張，由成立前一個星期開始，晚晚都等偶像等至起碼午夜12時！適逢那幾天都凍得很，不過十一、二度，但Osca仍是心甘情願：「Kenny同Steven都好好，成日叫我哋早啲走唔好冷病。所以我會更加畀心機支持佢哋。」
鬥墟冚
適逢剛過去的周末大家都有Show出，我哋當然不放過機會直擊Fans情況。
事發現場：銅鑼灣東角駅前
日期：2003年3月22日
事件：街頭派發萬樂珠新口味產品
難得有偶像歌手在街頭鬧巿，不設防式的派糖，場面唔單止墟冚。歌迷們一早舉齊「熊貓」、「半成年」等大型紙牌，估計吸引近百歌迷到場助威，加埋圍觀途人，擠得原本已迫爆的銅鑼灣水洩不通。
事發現場：黃埔海逸酒店Ballroom
日期：2003年3月23日
事件：第一次正式與歌迷聚會
Boy'Z出道以來第一次正式與歌迷的聚會，就吸引多達500名Fans，都咪話唔犀利！聚會在星期日下午3時半舉行，由於不設劃位，排頭位的歌迷早在星期六晚10時就通宵排隊！
論後台
Shine所屬的EMI為樂壇巨頭，但初出道時卻沒排山倒海式的宣傳。且出道年多，仍未組成正式的歌迷會。歌迷Casper話正着力籌備，預計4月中至尾將會成立。
單係為Boy'Z命名，英皇娛樂已搞招募造勢，再於上月十號搞了個「一夜成名音樂會」公告天下，並成立歌迷會。據公司有關方面透露，短短個零月，已有近千Fans成為會員，風頭一時無兩！
我們再轉戰街頭，再讓他們來一次比拼，結果發現，現階段Shine依然領先，不過剛出道的Boy'Z似乎聲勢凌厲，不可小覷。
我哋走到買相蒲點TeensStation訪問賣相情況。售貨員Sharon話：「講貨量Boy'Z多好多，因為佢哋Function多，一星期可以返到2、3次貨。每次有成二、三十款！相反Shine一星期大約都係返一次貨，單頭連合照夾埋都係十幾款。但可能Boy'Z嘅相太多，造型表情時有重複，啲客每次都揀3、4張。但Shine啲Fans就會一次過掃晒全套。所以平均一星期Shine賣到3、4百張相，而Boy'Z就約二百零。」
在旺角及銅鑼灣隨機訪問了30位途人，其中15個話鍾意Shine多啲，12人就話捧Boy'Z，重有3個騎牆，聽吓佢哋點樣講：