四月一日，估唔到愚人節節目係去超級市場掃貨，搞笑變成事實。曾幾何時，香港人至嘲笑廣州人煲醋搶米買板藍根，竟然咁快就輪到自己，真係應咗梁司長個句有咁耐××。
一場春瘟，掃到香港八零九落。不過有相反理論者話，老董並非受害者而係得益者，佢真係多得今次SARS非典型肺炎唔少。
第一，SARS將全港嘅注意力轉移，冇人再叫梁錦松下台，老董保松有望成功，得來全不費工夫。第二，連出位主教陳日君都叫人大敵當前，放下分歧，先齊齊對付呢隻病毒，唔好咁多批評，你話老董係咪執到？第三，要徹底消滅SARS，點都要幾個月，到時六百萬港人已筋疲力盡，邊個有氣力去同葉劉計數，二十三條肯定無風無浪通過。
重有，香港「集會之都」，「遊行之都」嘅惡名肯定可清除，多人聚集易散播病毒，邊個敢去參加？況且大家戴住口罩，嗌口號都唔慌大聲。
最後，相反理論家話SARS連家庭問題亦解決埋，因為疫症流行，大人細路都冇得去Wet，困喺屋企被迫親子，真特區一大德政也。佢愈講愈興奮，八方見係愚人節，由佢威，自己嗱嗱臨衝落街，買番幾條廁紙。
傳真︰2623-9278
電郵︰