3月份因有多個新盤開賣，所以就算有非典型肺炎事件，代理行嘅生意都有升冇跌。
中原一姐劉瑛琳認為今個月二手難做，因為唔少業主唔係好肯畀客睇樓，除非係吉樓，所以佢哋會加強做一手，包括將啲新盤資料做得詳細啲，等介紹時可以易做啲。
美聯新界區助理董事鄧天勇就趁市靜，下個禮拜喺自己區搞深造班，加強代理做二手盤嘅技巧，包括法律問題同傾價技巧等。到時重會用真實個案做例子。呢個深造班會由鄧天勇、兩個高級區域經理陳光明同歐子軒負責。
𠵱家有代理做慣一手，但做二手就唔熟手。培訓之後應會有改善。
講番美聯沙田同大埔區嘅成績，三月佣金有九百三十萬，一手佔四百七十萬，主要係做畢架山一號同將軍澳廣場。二手有三百六十萬，其餘係做租務。而大埔豪宅分行做到一百二十五萬。
有特色嘅豪宅物業，最近時興招標出售，長實畢架山一號兩度推出單位招標，早前推出一期最後一個三座E室水晶複式單位招標。長實高級營業經理郭子威話，個單位一共收到十七份標書，最後以二千二百四十萬成交，呎價九千六百幾，係十一個單位中，呎價最高嘅一個。
十一個複式單位已售罄，呎價最平都要八千三百元，總共套現二億一千萬。
郭子威重話，針對內地買家，佢哋考慮准許買家做按揭，用人民幣供樓，不過兌換率點計重要研究，或者會鎖定一個兌換率。
肺炎搞到人心惶惶，經紀為咗搵食，都要頂硬上開工，例必戴口罩之餘，帶客睇樓都要諗吓計，事關好多業主都怕咗肺炎，一來怕被傳染，二來又唔想俾人無理壓價，好多時要經紀肯定個客真係有心落定，至肯開門俾人睇樓。
幾百萬嘅交易，點可以話未睇就肯定買吖，所以經紀為咗做生意，都會選擇帶客睇鎖匙盤，一來業主容易話為啲，二來大多數鎖匙盤都係吉屋，業主唔怕受感染，個客又睇得安心啲。所以近排雖然肺炎事件困擾全港，重有零星生意做，就係咁解嘞。
肺炎疫症蔓延，人人都返屋企食飯，街市舖位嘅投資價值即時被睇高一線。美聯舖位部營業董事黃子華話，長沙灣永隆街街市一個舖位，以四百三十五萬賣咗，比去年購入價三百三十萬，急漲三成二。
佢又講，呢個舖原業主，舊年一次過買埋鄰近一批商舖，至於今次拆售嘅1F號舖，租客係魚檔，由於近期街市生意興旺，放售咗一個月即獲承接，重賺咗一百零五萬。黃子華估計，街市舖位將會係未來兩個月內嘅「疫市」奇葩。
噚日係愚人節，唔少人都趁機會整蠱吓人，掃走吓近排非典型肺炎事件嘅悶氣。噚日收到一封署名係葉兆球嘅傳真，抬頭係寫畀中原集團主席施永青。
葉生投訴中原一名姓柯嘅營業董事同埋姓陳嘅經理，代佢處理購買旺角砵蘭街三百號舖位，業主開價一千四百萬，佢已簽訂合同，並交付五十萬元支票落定。
不過，佢話其後中原嘅代理將個舖位賣咗畀第二個買家，成交價係一千二百六十萬元。葉生質疑中原究竟有何道理，個舖位高價唔賣，平價至成交。
葉生重話，今個禮拜五會喺尖沙嘴文化中心嘅酒樓搞個論壇，公開討論吓地產代理嘅操守，重邀請傳媒、施生同地產代理監管局出席，正面對質。
施生就話，事件已交咗畀廉署處理，若正式立案進行調查，或不便出席。他個人則唔介意出席喎。
蘭西
電郵地址：
