鍾麗緹日前乘國泰航機往台灣時，同機有乘客感染非典型肺炎，日前她回港後即時與衞生署聯絡，幸好證實她未有受感染。但其好友前日卻不幸在廣州死於非典型肺炎，令她深感病毒的恐怖，故決定日內即帶同女兒離開香港，返加拿大父母家暫避鋒頭。
非典型肺炎在港肆虐，日前衞生署公布上月二十一日由香港飛往台北的CX510國泰班機，證實有乘客感染非典型肺炎，要求當日乘搭此班機的乘客與衞生署聯絡。原來鍾麗緹當日亦是該班機的乘客之一，上周她甫返港即與衞生署接觸，幸好經檢驗後證實她未有受到感染。
雖然逃過一劫，但前晚鍾麗緹表示，在北京認識的一位舞蹈員好友卻沒如此幸運，她的男友嚴仲輝（John）剛通知她，指該名朋友因患上非典型肺炎，前日於廣州猝死。在香港與內地市民人人自危的情況下，鍾麗緹決定日內偕女兒離港，返加拿大暫避。
鍾麗緹表示近一個月來都沒有見過該位不幸病逝的好友，她說：「呢位朋友係北京人，佢喺北京做舞蹈員，我係經男友介紹而認識佢嘅。諗唔到幾日前佢去咗廣州就發覺唔舒服，今日重過埋身，頭先啱啱收到男友電話知道佢係死於非典型肺炎。之前我都唔覺呢種病毒咁恐怖，𠵱家連自己朋友都出事，我真係好驚，所以暫時我會取消所有工作，日內會同埋個女返加拿大避一避。」
其實上周鍾麗緹往台灣拍廣告時，曾出現發熱、咳嗽和多痰的病徵，令她一度擔心自己會中招，幸好看過醫生後證實她只是患感冒，才放下心來。而她日前返港後，更即時將家居消毒，出街時亦會戴上口罩。
鍾麗緹說：「近排我不斷上網了解呢個病嘅資料，𠵱家我最擔心個女會有事，所以我都吩咐工人唔好亂咁帶囡囡出街，因小朋友嘅抵抗力冇咁強，我住喺愉景灣嘅朋友已經驚到搭飛機返咗加拿大，所以我都諗住返去，順便探吓屋企人。雖然加拿大都發現有非典型肺炎個案，但情況冇香港咁嚴重，所以我都係覺得返加拿大比香港好少少。」
而已經十年沒有吃紅肉的鍾麗緹，前晚更開始恢復食紅肉，她說：「我睇啲資料話食紅肉可以增強抵抗力，所以我都改變埋飲食習慣，估唔到咁耐冇食牛扒，𠵱家食番係咁好味嘅。我都聽人講話板藍根對預防肺炎有效，所以都有買嚟飲。
「𠵱家香港患非典型肺炎嘅人不斷增加，政府又未有方法阻止病毒擴散，我諗好多市民同我嘅感受都一樣，好似活在驚恐之中，唔知幾時到自己感染到。我爹哋同媽咪都好擔心，呢排成日打電話畀我問近況，如果我返加拿大，相信佢哋會安心啲。」
採訪：陳月媚 攝影：林德雄
